Նոյեմբերի 5-ի բիզնես լուրերը

Տեղական

Ռուսական հացահատիկ տեղափոխող գնացքը շուտով կհասնի Հայաստան։ Այս մասին հայտնել է փոխվարչապետ Մհեր Գրիգորյանը՝ նշելով, որ այն արդեն անցնում է Ադրբեջանի տարածքով՝ դեպի Վրաստան։ Իրադարձությունը կարևոր է փոխվստահության ամրապնդման և խաղաղության օրակարգի առաջմղման տեսանկյունից։

Հայաստանը և Թուրքիան համաձայնության են եկել ավելացնել չվերթների քանակը։ ԱԳ նախարար Արարատ Միրզոյանի խոսքով՝ նոր չվերթներ կլինեն դեպի Երևան, Գյումրի, Ստամբուլ և հնարավոր է՝ Անկարա։ Շիրակ օդանավակայանը նույնպես կմիանա չվերթներին։

Վիզաների ազատականացման գործընթացը մտնում է կարևոր փուլ։ ՆԳ նախարար Արփինե Սարգսյանը հանդիպել է Եվրահանձնաժողովի ներկայացուցիչ Յոհաննես Լուխներին՝ քննարկելով գործողությունների ծրագրի հիմնական ուղղությունները։ Նախարարը նշել է, որ վիզաների ազատականացման ծրագիրը դիտարկվում է որպես բարեփոխումների ռազմավարական փաստաթուղթ։

Գործադիրը նպատակ ունի նվազեցնել ՀՀ սահմանի անցման կետերում կուտակումները։ Առաջարկվում է սահմանել բնապահպանական և ճանապարհային հարկերի վճարման մինչև 15-օրյա ժամկետ ՀՀ սահմանը հատելուց հետո։ Բացի այդ, նախատեսվում է որոշ դեպքերում ազատել բեռնատարներին ճանապարհային հարկից, եթե ելքը եղել է ճանապարհի անանցանելիությամբ պայմանավորված։

2025թ․ հունվար–սեպտեմբերին Հայաստանում էլեկտրաէներգիայի արտադրությունն աճել է 8.2%-ով՝ կազմելով 7,355.6 մլն կՎտժ։ ՀԷԿ-երի արտադրությունն աճել է 20.9%, ՀԱԷԿ-ի՝ 6%, իսկ ՋԷԿ-երի արտադրությունը նվազել է 15.3%։

Միջազգային

ԱՄՆ-ն դադարեցնում է ՄԱԿ-ի ֆինանսավորումը բարեփոխումների ակնկալիքով։ ՄԱԿ-ում ԱՄՆ մշտական ներկայացուցիչ Մայք Ուոլցի խոսքով՝ կազմակերպության բյուջեն կկրճատվի 15%-ով, ինչը կնվազեցնի անձնակազմը 18%-ով և խաղաղապահ ուժերը՝ 25%-ով։ Կրճատումները պայմանավորված են մի շարք երկրների՝ այդ թվում ԱՄՆ-ի կողմից վճարումների չկատարմամբ։

Իրաքը չեղարկել է ռուսական «Լուкойլ»-ից հում նավթի երեք բեռի առաքումը՝ նախատեսված նոյեմբերի 11-ին, 18-ին և 26-ին։ Ընկերությունը վերջին շրջանում տուժում է ԱՄՆ-ի և Մեծ Բրիտանիայի սահմանած պատժամիջոցներից։

Մի շարք գերմանական քաղաքներ տնտեսական պատճառներով հրաժարվել են ավանդական սուրբծննդյան տոնավաճառներից։ Պատճառը՝ անվտանգության ապահովման և պաշտպանական միջոցների աճող ծախսերն են, որոնք գերազանցել են 17.5 հազար եվրոն։

Վրաստանից 2025թ․ հունվար–սեպտեմբերին արտահանվել է 82,527 ավտոմեքենա՝ ընդհանուր 2.003 միլիարդ դոլար արժողությամբ։ 2024թ․ նույն ժամանակահատվածում վերաարտահանվել էր 78,610 մեքենա՝ 1.762 միլիարդ դոլար արժեքով։