Google-ը Genesis աշխատանքային անունով նոր արտադրանք է փորձարկում, որն օգտագործում է արհեստական բանականության (AI) տեխնոլոգիա լրատվական հոդվածներ գրելու համար: Ըստ New York Times-ի՝ Google-ն այս AI գործիքին հասանելիություն է տրամադրել մի շարք ազդեցիկ լրատվականների, այդ թվում՝ NY Times-ին, Washington Post-ին և Wall Street Journal-ին:
Genesis-ը կարողանում է տեղեկություններ հավաքել ընթացիկ իրադարձությունների մասին և ստեղծել նորությունների բովանդակություն՝ լրագրողների համար հեշտացնելով որոշ առաջադրանքների կատարումը և ստեղծելով ազատ ժամանակ, որը նրանք կարող են օգտագործել իրենց աշխատանքի այլ կարևոր ասպեկտների համար: Ըստ NY Times-ի անանուն աղբյուրներից մեկի՝ Google-ն ակնկալում է, որ այս արտադրանքը կդառնա լրագրողների անձնական օգնականը՝ թույլ տալով նրանց բարելավել և ավտոմատացնել շատ գործընթացներ իրենց աշխատանքում։
Google-ի մամուլի քարտուղար Ջեն Քրեյդերն ասել է, որ այժմ ընկերությունը լրագրողներին օգնելու համար արհեստական բանականությամբ աշխատող գործիքների տրամադրման գաղափարի ուսումնասիրման վաղ փուլերում է: Քրեյդերը հավելել է, որ այս գործիքները նախատեսված չեն լրագրողներին փոխարինելու համար, այլ միայն կօգնեն նրանց աշխատանքում։
Չնայած այն պոտենցիալ առավելություններին, որոնք կարող է առաջարկել AI տեխնոլոգիան, որոշ փորձագետներ դրանում նաև հնարավոր վտանգներ են տեսնում: Օրինակ՝ Նյու Յորքի քաղաքային համալսարանի լրագրության պրոֆեսոր և մեդիափորձագետ Ջեֆ Ջարվիսը նշում է, որ այս գործիքի ճիշտ օգտագործումը կարող է մեծապես հարստացնել նորությունների բլոկը: Այնուամենայնիվ, արհեստական բանականության ոչ պատշաճ կամ անվերահսկելի օգտագործումը կարող է վնասել լրագրության արժանահավատությանը և խաթարել լրատվամիջոցների նկատմամբ վստահությունը:
Ուշագրավ է, որ որոշ պարբերականներ, ինչպիսիք են NY Times-ը, NPR-ը և Insider-ը, նույնպես հետազոտություններ են անցկացնում նորություններ պատրաստելիս արհեստական բանականության օգտագործման ուղղությամբ: Associated Press-ը երկար ժամանակ հաջողությամբ օգտագործում է արհեստական բանականությունը տարբեր թեմաներով պատմություններ ստեղծելու համար, սակայն մինչ այժմ արհեստական բանականությունը չի փոխարինել լրագրողներին տեղեկատվական աշխարհում։
