Սեպտեմբերի 12-ի բիզնես լուրերը

Տեղական

Հայաստանի մաքսային ծառայությունը կգործի «Թրամփի ուղու» վրա
ՊԵԿ նախագահ Էդուարդ Հակոբյանը հայտարարել է, որ Հայաստանը մաքսային բարեփոխումների մասով պատրաստվում է գործել նախատեսվող «Թրամփի ուղու» վրա։ Նա նշել է, որ անկախ նախագծի մանրամասներից՝ Հայաստանի մաքսային քաղաքականությունը բոլոր սահմաններին ուղղված է առևտրի դյուրինացմանը։

Ճապոնիայի հետ կրկնակի հարկումը վերացվում է
Ազգային ժողովը վավերացրել է Ճապոնիայի հետ եկամուտների կրկնակի հարկումը բացառող կոնվենցիան։ Փաստաթուղթը ռեզիդենտներին տրամադրում է ավելի բարենպաստ հարկային պայմաններ, քան նախատեսված է ազգային օրենսդրությամբ։

Միգրացիոն համագործակցություն Ղազախստանի հետ
Հայաստանն ու Ղազախստանը պայմանավորվել են համագործակցել միգրացիայի ոլորտում։ Գործակցությունը ներառելու է վիճակագրության, իրավական տեղեկատվության և փորձի փոխանակում, ինչպես նաև քաղաքացիների իրավունքների պաշտպանությանն ուղղված քայլեր։

Թմրամիջոցների դեմ պայքարի արդյունքները
Այս տարվա ութ ամիսներին ՆԳՆ վարչությունը բացահայտել է հանցավոր 15 խումբ և փակել տելեգրամյան 30 հարթակ։ Ապօրինի շրջանառությունից հանվել է շուրջ 92 կգ թմրանյութ և հարյուրավոր դեղահաբեր։

Միջազգային

ԱՄՆ-ի և ԵՄ-ի խորհրդակցությունները Ռուսաստանի դեմ պատժամիջոցների շուրջ
Վաշինգտոնում շարունակվում են ԱՄՆ-ի և ԵՄ-ի խորհրդակցությունները՝ ուղղված Ռուսաստանի դեմ նոր պատժամիջոցների կիրառմանը։ Դոնալդ Թրամփը հայտարարել է, որ պատրաստ է անցնել սահմանափակիչ միջոցառումների երկրորդ փուլի կիրառմանը։

ԵՄ-ի ֆինանսական աջակցությունը Ուկրաինային
Եվրամիությունը Կիևին փոխանցել է մեկ միլիարդ եվրոյի չափով հերթական տրանշը սառեցված ռուսական ակտիվների եկամուտներից։ Ուկրաինայի վարչապետը նշել է, որ այս քայլը Եվրոպայի վճռականության ցուցիչ է։

Եվրոպայում քննարկվում է Իսրայելի ֆինանսավորման դադարեցումը
Եվրահանձնաժողովում քննարկվում է Իսրայելին տրամադրվող ֆինանսական աջակցության դադարեցման հարցը։ Որոշումը պայմանավորված է Գազայի շուրջ սրված իրավիճակով և խաղաղության պայմանների չկատարմամբ։

OpenAI-ի և Oracle-ի խոշոր պայմանագիրը
OpenAI-ն հինգ տարով կնքել է 300 միլիարդ դոլար արժողությամբ պայմանագիր Oracle-ի հետ՝ հաշվարկային հզորություններ գնելու համար։ Սա համարվում է ամպային ծառայությունների պատմության ամենամեծ գործարքներից մեկը։

Հետաքրքիր

Հայաստանի գարեջրի արտահանման կտրուկ աճը
Հայաստանը գրեթե իննապատկել է գարեջրի արտահանումը Ռուսաստան։ Եթե մեկ տարի առաջ արտահանման ծավալը կազմել էր մոտ 576 հազար դոլար, ապա այս տարվա առաջին կեսին այն գերազանցել է 5 մլն դոլարը։