Երևանում ավարտվել է ինքնակամ կառույցների հաշվառման գործընթացը

2023 թվականի հունվարի 1-ին Երևանում ավարտվել է ինքնակամ կառույցների հաշվառման գործընթացը: 2022 թվականին հանրապետությունում հաշվառվել է 26 հազար 615 ինքնակամ շինություն, որից 16 հազար 264-ը Երևանում: Կադաստրի կոմիտեն մարզերի բնակիչներին խորհուրդ է  տալիս չթողնել վերջին օրվան և ժամանակին դիմել ինքնակամ կառույցը հաշվառելու համար:

Այժմ գործընթացն իրականացվում է մարզերում, մասնավորապես, մինչև 2024 թվականի հունվարի 1-ը ժամկետ է սահմանված քաղաքային բնակավայրեր ընդգրկող համայնքների, մինչև 2025 թվականի հունվարի 1-ը՝ բացառապես գյուղական բնակավայրեր ընդգրկող համայնքների համար: ՀՀ կադաստրի կոմիտեի Գեոդեզիայի և հողաշինարարության վարչության պետ Գևորգ Մանուկյանը տեղեկացրել  է, որ հաշվառումը չի ենթադրում, որ ինքնակամ կառույցն անպայման օրինականացվելու է: