Պետական աջակցության նոր փուլ ԼՂ-ից տեղահանվածների համար. թվերը՝ ըստ ոլորտի. ԱՐՄԵՆՊՐԵՍ

Լեռնային Ղարաբաղից բռնի տեղահանված ընտանիքների բնակարանային ապահովման պետական աջակցության ծրագրի շահառուների թիվը 2025 թվականի առաջին եռամսյակի դրությամբ կտրուկ աճել է։ Եթե 2024 թվականին տրամադրվել էր ընդամենը 30 բնակարանային հավաստագիր, որոնցից ոչ մեկը չէր իրացվել, ապա այս տարվա նույն ժամանակահատվածում արդեն տրամադրվել է 835 հավաստագիր, որոնցից 58-ն արդեն իրացվել են։

Հայաստանի աշխատանքի և սոցիալական հարցերի նախարարության ներկայացուցիչ Գայանե Ղարագյոզյանի փոխանցմամբ՝ այս պահին 38 ընտանիք արդեն իսկ ձեռք է բերել անշարժ գույք, իսկ 20 ընտանիք ստացել է աջակցություն գործող հիպոթեքային վարկի մարման համար։ Ընդհանուր աջակցության ծավալը հասնում է մոտ 100 միլիոն դրամի։

Ինչպես է աշխատում ծրագիրը

Ծրագիրը ներառում է մի քանի բաղադրիչներ՝

• Բնակարան ձեռքբերելու նպատակով տրամադրվող հավաստագրեր,

• Աջակցություն՝ գոյություն ունեցող հիպոթեքային վարկերի մարման համար։

Երկրորդ բաղադրիչի դեպքում պետական աջակցությունը տրամադրվում է միանվագ, և յուրաքանչյուր ընտանիքի անդամի հաշվով այն կարող է լինել 2-ից 3 միլիոն դրամ՝ ուղղված մայր գումարի մարմանը։ Որոշ շահառուների դեպքում այդ օգնությունը բավարար է եղել վարկը լիովին մարելու համար։

Որտե՞ղ են շահառուները ձեռք բերել բնակարաններ

Ներկայացված տվյալներով՝ 38 շահառու ընտանիքներից բնակարանների աշխարհագրական բաշխումը հետևյալն է․

• Երևան – 9 ընտանիք

• Արարատ – 7 ընտանիք

• Կոտայք և Սյունիք – 5-ական

• Գեղարքունիք – 4

• Լոռի – 3

• Արմավիր – 2

• Արագածոտն, Վայոց Ձոր, Տավուշ – յուրաքանչյուրը 1 ընտանիք

Այս պատկերն արձանագրում է, որ հիմնական շահառուները կենտրոնացած չեն միայն մայրաքաղաքում, այլև տարբեր մարզերում։

Ինչ խնդիրներ են առաջ գալիս բանկային փուլում

Մինչ ծրագրի իրականացումը հիմնականում ընթանում է սահուն, միակ խոչընդոտը կապված է շահառուների ժամկետանց վարկային պարտավորությունների հետ։ Ներկայումս գործող կարգի համաձայն՝ եթե շահառուն ունի ակտիվ ժամկետանց վարկ, ապա նրան չի տրամադրվում նոր վարկ, քանի որ այն ավտոմատ կերպով դասակարգվում է որպես ռիսկային։

Սակայն, ըստ Ղարագյոզյանի, Աշխատանքի և սոցիալական հարցերի նախարարությունը Կենտրոնական բանկի հետ համատեղ աշխատանք է տանում՝ այդ սահմանափակումը վերացնելու ուղղությամբ։ Ապրիլ ամսից ակնկալվում է, որ կգործի նոր նորմատիվ ակտ, համաձայն որի՝ 100 տոկոսով սուբսիդավորվող վարկերի դեպքում այդ սահմանափակումը չի կիրառվի։

Միևնույն ժամանակ, նա շեշտում է՝ եթե շահառուն ծրագրով ստացած գումարից ավել վարկ է վերցնում, ապա պարտադիր է, որ նա ունենա բարենպաստ վարկային պատմություն և այս պահին չունենա ժամկետանց պարտավորություններ։

Աղբյուր՝ ԱՐՄԵՆՊՐԵՍ

Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: