Վերջին երկու շաբաթների ընթացքում բավական բուռն քննարկման արժանացավ որոշ գիտահետազոտական ինստիտուտների ինտեգրման միջոցով բուհերի խոշորացման և դրանք Արագածոտնի մարզ՝ Աշտարակ տեղափոխելու մասին Կառավարության տեսլականը, որը մասամբ ամրագրված է Կրթության մինչև 2030 թ. զարգացման պետական ծրագրում։Բուհերի շենքերի վաճառքը ֆինանսական մեծ ռեսուրսներ գեներացնելու նպատակով հարված է ոչ միայն կրթական մշակույթին, այլև մեր երկրի պատմամշակութային ժառանգությանը։
Կրթական համակարգը սոցիալիզացիայի կարևոր, բայց միակ ինստիտուտը չէ։
Կրթական արդյունք ստեղծելու համար պետք է հստակեցնելու հետևյալը. ի՞նչ է անհրաժեշտ զարգացնել մարզերում առաջնահերթ. ակադեմիական քաղաք կառուցել թե՞ զարգացնել միջին մասնագիտական կրթությունը, փորձել ներգրավել խոշոր գործատուների, ստեղծել աշխատատեղեր՝ ձևավորելով այդ մասնագիտությունների պահանջարկն ըստ մարզերի առանձնահատկությունների։ Մարզերում բնակվող երիտասարդների մայրաքաղաք տեղափոխվելու հիմքում ընկած շարժառիթը միայն կրթություն ստանալը չէ, այլև, և ամենից առաջ, աշխատանք գտնելը:
