Հայկական բարեգործական ընդհանուր միության «Սովորի՛ր եւ վաստակի՛ր. Արցախ» ծրագիրը մեկնարկել է 2019 թվականին Արցախում, սակայն 2023 թ. բռնի տեղահանումից հետո Հայկական բարեգործական ընդհանուր միությունը որոշել է այն շարունակել Հայաստանում՝ օգնելու մեր հայրենակիցներին իրենց տեղը գտնել Հայաստանում։
ՀԲԸՄ՝ «Սովորի՛ր և վաստակի՛ր․ Արցախ» ծրագրի շրջանակներում անցկացվող կարիերայի տոնավաճառներն իրականություն դարձան Երևանի պետական համալսարանի և Եվրասիա միջազգային համալսարանի հետ գործակցությամբ:
Ծրագրի իրականացնող երկու բուհերի ներկայացուցիչները շեշտում են իրենց սոցիալական պատասխանատվությունը և ձգտումը ուսանողների և շրջանավարտների աշխատաշուկայում մրցունակության բարձրացման ծրագրերի հարուստ փորձը նպատակաուղղել արցախցիների սոցիալ-տնտեսական ինտեգրման խթանմանը։
Կազմակերպիչները նաև ապակենտրոնացրել են տոնավաճառը՝ դրանցից երկուսն անցկացնելով Տավուշում՝ Երևանի պետական համալսարանի Իջևանի մասնաճյուղում և մյուսը՝ Աբովյան քաղաքում:
Բացի գործատուների հետ հանդիպումից, «Կարիերայի նոր հնարավորություններ և հեռանկարներ» խորագրով տոնավաճառների այցելուները հնարավորություն են ունեցել մասնակցելու նաև աշխատաշուկայում նրանց մրցունակությունը խթանող բազմաթիվ սեմինար-դասընթացների:
