ՀՀ ընտրական օրենսգիրքը շատ ազատական է, ԿԸՀ-ն չի կարող իր հայեցողությամբ մերժել որևէ քաղաքական ուժի գրանցումը. Հովակիմյան

ՀՀ ընտրական օրենսգիրքը շատ ազատական է, ԿԸՀ-ն չի կարող իր հայեցողությամբ մերժել որևէ քաղաքական ուժի գրանցումը. Հովակիմյան

Հայաստանի կենտրոնական ընտրական հանձնաժողովի նախագահ Վահագն Հովակիմյանն անդրադարձել է շրջանառվող խոսակցություններին, թե Հայաստանի իշխանությունները պատրաստվում են որոշ քաղաքական ուժերի թույլ չտալ մասնակցել առաջիկա խորհրդարանական ընտրություններին։

«Արմենպրես»-ի փոխանցմամբ՝ ՀՀ ԿԸՀ նախագահը թեմային անդրադարձել է ԱԺ պետական-իրավական հանձնաժողովի նիստում՝ պատասխանելով «Քաղաքացիական պայմանագիր» խմբակցության պատգամավոր Լիլիթ Մինասյանի հարցին։

Պատգամավորը նշել է, որ ընդդիմության կողմից թեզեր են շրջանառվում, թե իշխանությունները պատրաստվում են որոշ քաղաքական ուժերի թույլ չտալ մասնակցել հունիսի 7-ին Հայաստանում կայանալիք խորհրդարանական ընտրություններին՝ մերժելով նրանց գրանցումը։ Նա ԿԸՀ նախագահին խնդրել է հստակ պարզաբանել, թե ինչ է նախատեսում ՀՀ օրենսդրությունն այս հարցի հետ կապված։

Վահագն Հովակիմյանը պարզաբանել է, որ Հայաստանի Ընտրական օրենսգիրքն այնքան ազատական է, որ քաղաքական ուժը, որպեսզի չգրանցվի, հենց ինքը պետք է այդ ուղղությամբ լուրջ ջանքեր գործադրի։  

«Մեր ընտրական օրենսգիրքն այնքան ազատական է, որ քաղաքական ուժը, որպեսզի չգրանցվի, ինքը բավականին ջանքեր պիտի գործադրի, այսինքն՝ պետք է, օրինակ, միտումնավոր փաստաթղթերը չներկայացնի։

Եթե նույնիսկ քաղաքական ուժը փաստաթղթերը թերի է ներկայացնում, Ընտրական օրենսգիրքը պահանջում է, որպեսզի մենք քաղաքական ուժին 48 ժամ ժամանակ տանք՝ թերությունները շտկելու համար։

Ընտրական օրենսգիրքը նույնիսկ թույլ չի տալիս փաստաթղթերի թերի լինելու պատճառով չընդունել։ ԿԸՀ-ն պարտավոր է ընդունել փաստաթղթերն այնպես, ինչպես ներկայացնում է քաղաքական ուժը, իսկ եթե պարզվում է, որ կան թերություններ, ԿԸՀ-ն պարտավոր է տալ ժամանակ, որպեսզի թերությունները շտկվեն։ Մեկ պարագայում կարող է քաղաքական ուժի գրանցումը չլինել, դա կլինի այն դեպքում, եթե կուսակցությունը կամ դաշինքը հրաժարվի թերությունները վերացնել»,- ասել է Հովակիմյանը։

Նա հավելել է, որ վերը նշված գործընթացներն էլ տեղի են ունենում թափանցիկության պայմաններում՝ ԿԸՀ բաց նիստի ժամանակ։

«Այսինքն՝ մի պարագայում կարող է քաղաքական ուժը կամ դաշինքը չգրանցվել, եթե հրապարակային հրաժարվի օրենքով սահմանված փաստաթղթերը ներկայացնելուց կամ սխալ ներկայացված փաստաթղթերը ուղղելուց։ Իսկ այս դեպքում չի ստացվելու, որ ԿԸՀ-ն ինչ-որ մեկին չգրանցեց, սա կնշանակի, որ քաղաքական ուժը չի ցանկացել գրանցվել»,- մանրամասնել է ԿԸՀ նախագահը։

Հովակիմյանը պարզաբանել է՝ Հայաստանի օրենսդրությունը թույլ չի տալիս, որպեսզի Կենտրոնական ընտրական հանձնաժողովը իր հայեցողությամբ որևէ քաղաքական ուժի չգրանցի ընտրություններին մասնակցելու համար։