Երևանի «Շտապբուժօգնություն» ծառայությունում իրականացվել են տեխնիկական արդիականացման ծրագրեր

Նախատեսվում է ձեռք բերել ևս 7–10 շտապ բուժօգնության ավտոմեքենա։

Հայաստանի վարչապետ Նիկոլ Փաշինյանն այցելել է Երևանի «Շտապբուժօգնություն» ծառայություն, որտեղ իրականացվել են տեխնիկական հագեցման և արդիականացման ծրագրեր։ Այցի ընթացքում նրան ուղեկցել են Երևանի քաղաքապետ Տիգրան Ավինյանը և առողջապահության նախարար Անահիտ Ավանեսյանը։

Տեղեկացվել է, որ ծառայության շարժակազմը համալրվել է ժամանակակից շտապ բուժօգնության 7 նոր ավտոմեքենաներով, որոնցից 6-ը գծային մեքենաներ են, իսկ մեկը՝ ռեանիմոբիլ։ Նոր ավտոմեքենաները հագեցած են ժամանակակից բժշկական սարքավորումներով և նախատեսված են արտակարգ իրավիճակներին առավել արագ և արդյունավետ արձագանք ապահովելու համար։

Նշվել է, որ 2026 թվականին նախատեսվում է ձեռք բերել ևս 7–10 շտապ բուժօգնության ավտոմեքենա՝ ավտոպարկի փուլային և ամբողջական թարմացման, ինչպես նաև ծառայության կայուն և անխափան աշխատանքի ապահովման նպատակով։

Այցի շրջանակում ներկայացվել է նաև հեռախոսազանգերի կենտրոնի գործունեությունը։ Նշվել է, որ իրականացվել են թվայնացման աշխատանքներ, որոնց արդյունքում կանչերի գրանցումն իրականացվում է պլանշետների միջոցով, ներդրվել է զանգերի նույնականացման համակարգ, ինչպես նաև բուժառուների էլեկտրոնային գրանցում։

«1-03» ծառայության արդիականացման շրջանակում ներդրվել են զանգերի ձայնագրման և մոնիտորինգի գործիքներ, ինչի արդյունքում բաց թողնված զանգերի թիվը հասցվել է զրոյի։ Տեղեկացվել է նաև, որ համակարգը սպասարկում է ոչ միայն Երևանի, այլև Հայաստանի ամբողջ տարածքից «1-03» համարին մուտքագրված զանգերը՝ ապահովելով դրանց կենտրոնացված կոորդինացումը։