Եվրամիության վեց երկրներ հանդես են եկել համատեղ նախաձեռնությամբ՝ կոչ անելով ներդնել գերշահույթի հարկ ԵՄ նավթային ընկերությունների համար, որոնք Մերձավոր Արևելքում հակամարտության ֆոնին կտրուկ ավելացրել են իրենց եկամուտները։ Այս մասին հայտնում է Agence France-Presse գործակալությունը՝ հղում անելով պաշտոնական նամակին։
Նախաձեռնող երկրները և դրանց ներկայացուցիչները․
Գերմանիա, Իտալիա, Ավստրիա, Լեհաստան, Պորտուգալիա — ֆինանսների նախարարներ
Իսպանիա — էկոնոմիկայի նախարար
Համատեղ նամակն ուղարկվել է Իռլանդիայի ֆինանսների նախարարին, քանի որ այդ երկիրն այժմ նախագահում է ԵՄ Խորհուրդը։ Նախարարները պահանջում են, որպեսզի նավթային ընկերությունների գերշահույթների հարկման հարցը պաշտոնապես ընդգրկվի սեպտեմբերին Դուբլինում կայանալիք ԵՄ ֆինանսների նախարարների հանդիպման օրակարգում։
Ըստ AFP-ի՝ նախարարներն ընդգծում են, որ եվրոպական երկրներն այժմ բախվել են վերջին տասնամյակների ընթացքում վառելիքի առաջարկի ամենամասշտաբային ճգնաժամերից մեկին։ Միևնույն ժամանակ, ամբողջ աշխարհում և Եվրոպայում աճում է հանրային դժգոհությունը՝ կյանքի արժեքի և էներգակիրների գնաճի պատճառով։
