ԱՄՆ-ն երկիրը կամավոր լքող անօրինական ներգաղթյալներին մինչև 3000 դոլար կվճարի. Reuters

Ծրագիրը նաև ներառում է անվճար ավիատոմսեր դեպի իրենց ծագման երկիր։

Reuters–ը հաղորդում է, որ ԱՄՆ իշխանությունները ակտիվացնում են անօրինական ներգաղթյալների թիվը կրճատելու ջանքերը՝ ֆինանսական խթաններ առաջարկելով նրանց, որոնք համաձայն են կամավոր լքել երկիրը մինչև տարեվերջ։

Վաշինգտոնի ներգաղթային քաղաքականությունը շարունակում է խստացվել բյուջեի և անվտանգության համակարգի վրա բեռը նվազեցնելու անհրաժեշտության մասին պնդումների ֆոնին։

Հիմնական գործիքներից մեկը դարձել է այսպես կոչված ինքնաարտաքսման ծրագիրը, որի պայմանները զգալիորեն վերանայվել են։

ԱՄՆ ներքին անվտանգության նախարարությունը հայտարարել է, որ Թրամփի վարչակազմը եռապատկել է երկրից կամավոր լքելու համաձայն միգրանտների համար վճարումների չափը։

Այսպես կոչված վճարումների չափը մեծացվել է մինչև 3000 դոլար։ Այն հասանելի կլինի Միացյալ Նահանգներում անօրինական կերպով գտնվող անձանց, ովքեր կհեռանան մինչև այս տարվա վերջը։

Ծրագիրը նաև ներառում է անվճար ավիատոմսեր դեպի իրենց ծագման երկիր։

Գերատեսչությունը ընդգծել է, որ այս միջոցառումը նպատակ ունի կրճատել կառավարության ծախսերը։ Ըստ ԱՄՆ ներքին անվտանգության ծառայության՝ մեկ անօրինական անձի ձերբակալման, կալանավորման և արտաքսման միջին արժեքը կազմում է մոտավորապես 17,000 դոլար։

Հայրենիքի անվտանգության նախարարության քարտուղար Քրիստի Նոեմը նշել է. «Անօրինական ներգաղթյալները պետք է օգտվեն այս նվերից և ինքնաարտաքսվեն, քանի որ եթե նրանք դա չանեն, մենք կգտնենք նրանց, կձերբակալենք, և նրանք երբեք չեն վերադառնա»։

Գործընթացը պարզեցնելու համար մարտ ամսին գործարկվեց թարմացված CBP Home բջջային ծառայությունը՝ կամավոր մեկնումների գրանցման համար։

Նախկինում CBP One անունով հավելվածն օգտագործվում էր նախորդ վարչակազմի կողմից՝ միգրանտներին երկիր օրինական կերպով մուտքագրելու համար։