ԱՄՆ զինված ուժերը միջազգային ջրերում հարվածել են թմրավաճառների նավին

ԱՄՆ զինված ուժերը հարվածել են վենեսուելական Tren de Aragua հանցավոր խմբավորման նավին, որը թմրամիջոցներ էր տեղափոխում ԱՄՆ, սպանվել է թմրամիջոցների ապօրինի շրջանառության 11 մասնակից, հայտնել է ԱՄՆ նախագահ Դոնալդ Թրամփը Truth Social սոցիալական ցանցում։ Նախագահը նշել է, որ ոչ մի ամերիկացի զինծառայող չի տուժել։

Tren de Aragua-ն գտնվում է Վենեսուելայում, բայց ակտիվ է նաև լատինաամերիկյան մյուս երկրներում, ինչպես նաև ԱՄՆ-ում։ Միացյալ Նահանգների տարածքում խմբավորումը ահաբեկչական է ճանաչվել: Թրամփն իր հրապարակման մեջ կրկին ակնարկել է, որ այն կապված է Վենեսուելայի նախագահ Նիկոլաս Մադուրոյի հետ։

Մադուրոն ԱՄՆ-ին մեղադրել է նարկոթրաֆիկի մասին տեղեկությունները կեղծելու համար, որի նպատակը, ըստ նրա, իրեն իշխանությունից հեռացնելն է:

Ավելի վաղ ամերիկյան լրատվամիջոցները հայտնել էին, որ ԱՄՆ նախագահը, առանց բարձրաձայնելու, հրամայել է ամերիկյան ռազմածովային ուժերն օգտագործել Վենեսուելայի մոտ ջրերում՝ լատինաամերիկյան նարկոկարտելներին հարվածելու համար։ Նման ծրագրերը մտահոգել են մի շարք երկրների, այդ թվում՝ Վենեսուելայի իշխանություններին։