ԱՄՆ պետքարտուղարի տեղակալը «մեծ իրադարձություն» է անվանել Էլ Մենչոյի վերացումը

Նա նշել է, որ «լավ տղաները ավելի ուժեղ էին, քան վատ տղաները» և շնորհավորել է Մեքսիկայի իրավապահ մարմիններին։

ԱՄՆ պետքարտուղարի տեղակալ Քրիստոֆեր Լանդաուն X սոցիալական մեդիա հարթակում հայտարարել է, որ մեքսիկական Խալիսկո նոր սերնդի (CJNG) թմրավաճառքի առաջնորդ Նեմեսիո Օսեգուերա Սերվանտեսի՝ հայտնի որպես Էլ Մենչո, վերացումը «մեծ իրադարձություն» է։

«Ես հենց նոր տեղեկացա, որ Մեքսիկայի անվտանգության ուժերը վերացրել են Էլ Մենչոյին՝ ամենաարյունալի և անողոք թմրավաճառներից մեկին։ Սա մեծ իրադարձություն է Մեքսիկայի, Միացյալ Նահանգների, Լատինական Ամերիկայի և աշխարհի համար», — գրել է Լանդաուն։

Նա նշել է, որ «լավ տղաները ավելի ուժեղ էին, քան վատ տղաները» և շնորհավորել է Մեքսիկայի իրավապահ մարմիններին։

Փետրվարի 22-ին Էլ Մենչոյի վերացման մասին հաղորդագրություններից հետո զանգվածային անկարգություններ են սկսվել Մեքսիկայի առնվազն հինգ նահանգներում։

Մեքսիկայի ազգային պաշտպանության նախարարության տվյալներով՝ թմրավաճառը ծանր վիրավորվել է հատուկ գործողության ընթացքում և մահացել Մեխիկո քաղաքի հիվանդանոց ուղղաթիռով տեղափոխելիս։

Խալիսկո նահանգը դարձել է անկարգությունների էպիկենտրոն։ Տապալպա մունիցիպալիտետում իրականացված դաշնային գործողությունից հետո թմրավաճառության խմբավորման անդամները փակել են մայրուղիները։

Գվադալախարայում, Տալայում, Տապալպայում և Պուերտո Վալյարտա հանգստավայրում գրանցվել են մեքենաների հրկիզման և ճանապարհների արգելափակման դեպքեր։