ԱՄՆ-ը 30-օրյա թույլտվություն է տալիս Հնդկաստանին ռուսական նավթի գնումների համար

Որոշումը նպատակ ունի ապահովել նավթի անխափան հոսքը համաշխարհային շուկա։

ԱՄՆ ֆինանսների նախարարությունը 30-օրյա ժամանակավոր թույլտվություն է տրամադրում հնդկական նավթավերամշակման գործարաններին՝ ռուսական նավթ գնելու համար։ Այս մասին սոցցանցերում գրել է ԱՄՆ ֆինանսների նախարար Սքոթ Բեսենթը։

Նրա խոսքով՝ որոշումը նպատակ ունի ապահովել նավթի անխափան հոսքը համաշխարհային շուկա։

«Այս կարճաժամկետ միջոցառումը զգալի ֆինանսական շահ չի բերի Ռուսաստանի կառավարությանը, քանի որ թույլ է տալիս նավթի հետ կապված այնպիսի գործարքներ, որոնք արդեն գտնվում են ծովում։ Հնդկաստանը Միացյալ Նահանգների կարևոր գործընկերն է, և մենք ակնկալում ենք, որ Նյու Դելին կավելացնի ամերիկյան նավթի գնումները։ Այս ժամանակավոր միջոցառումը կթուլացնի ճնշումը՝ կապված Իրանի՝ համաշխարհային էներգետիկ շուկան զավթելու փորձի հետ»,– նշել է Բեսենթը։

Ավելի վաղ ԱՄՆ նախագահ Դոնալդ Թրամփը հայտարարել էր, որ Նյու Դելին հրաժարվել է ռուսական նավթի գնումներից՝ ԱՄՆ-ի հետ առևտրային գործարքի դիմաց, սակայն Հնդկաստանի իշխանությունները այդ տեղեկությունը չեն հաստատել։