Թրամփի Մար-ա-Լագոյի միջոցառումը սոցիալական ցանցերում համեմատվել է ֆուրրի մշակույթի հետ

Միջոցառումը նվիրված է եղել «քաջ շներին»։

ԱՄՆ նախագահ Դոնալդ Թրամփի Մար-ա-Լագո մասնավոր ակումբում կայացած հերթական միջոցառումը լայն արձագանք է ստացել սոցիալական ցանցերում և լրատվամիջոցներում՝ միջոցառման ձևաչափի և տեսանյութերի պատճառով։

Համացանցում տարածված կադրերը մի շարք օգտատերերի մոտ առաջացրել են համեմատություններ ֆուրրի մշակույթի հետ՝ ենթամշակույթ, որի անդամները հետաքրքրված են մարդակերպ կենդանիներով և դրանց մարդկային հատկանիշներով։ Միջոցառման վերաբերյալ արձագանքել է նաև Կալիֆոռնիայի նահանգապետ Գևին Նյուսոմը, որը համարվում է Թրամփի վաղեմի քաղաքական քննադատներից։ Նա միջոցառման տեսանյութը հրապարակել է X սոցիալական հարթակում՝ գրելով. «Ինչո՞ւ է Դոնալդ Թրամփը ֆուրրի երեկույթ կազմակերպում»։

Ամերիկյան մի շարք աղբյուրների տվյալներով՝ 79-ամյա Դոնալդ Թրամփը մասնակցել է գալային միջոցառմանը և հանդես եկել ելույթով։ Այդ մասին հաղորդել են MeidasTouch-ի TikTok էջը և Palm Beach Florida Weekly-ի խմբագիր Քելլի Հենրին, որը նաև հրապարակել է Թրամփի ելույթի տեսանյութը։

Միջոցառումը նվիրված է եղել «քաջ շներին», սակայն սա հակասական է դիտարկվել՝ հաշվի առնելով Թրամփի նախկին հայտարարությունները ընտանի կենդանիների վերաբերյալ։ Նա հայտնի է որպես ԱՄՆ այն քիչ նախագահներից մեկը, որը Սպիտակ տանը չի ունեցել որևէ ընտանի կենդանի։ Թրամփը բազմիցս նշել է, որ չի սիրում ընտանի կենդանիներ և քաղաքական նպատակներով կենդանի պահելը համարում է իրեն խորթ մոտեցում։ 2019 թվականին Տեխասում կայացած նախընտրական հանրահավաքի ժամանակ նա հայտարարել էր, որ չի կարող պատկերացնել շանը Սպիտակ տան մարգագետնով զբոսանքի տանելը՝ այդ քայլը բնութագրելով որպես «անկեղծ»։

Թրամփի նախկին կինը՝ Իվանա Թրամփը, իր հուշագրությունում նույնպես նշել է, որ Թրամփը շներին չէր սիրում և խնդիրներ է ունեցել իր պուդելի՝ Չապիի հետ։

Մար-ա-Լագոն գտնվում է Ֆլորիդայում և հանդիսանում է մասնավոր ակումբ, որտեղ միջոցառումները կազմակերպվում են միայն անդամի հովանավորությամբ։ Այն ծառայել է որպես մի շարք անձնական և ընտանեկան կարևոր իրադարձությունների վայր․ այնտեղ տեղի են ունեցել Թրամփի երեխաների հարսանիքները, ինչպես նաև 2005 թվականին Դոնալդ և Մելանյա Թրամփների հարսանեկան ընդունելությունը։