Հոկտեմբերի 16-ին Երևանում անցկացվող COP17 համաժողովի շրջանակներում ՀՀ արտաքին գործերի և միջազգային առևտրի նախարար Արարատ Միրզոյանը պատասխանել է լրագրողների հարցերին՝ անդրադառնալով Ադրբեջանի չմասնակցելուն, ինչպես նաև ԹՐԻՓՓ (TRIPP) նախագծի վերաբերյալ Իրանից հնչող հայտարարություններին։
Ինչու է դա կարևոր. Միրզոյանը հստակեցրել է, որ ԹՐԻՓՓ-ի երկայնքով ամերիկյան զինված ներկայություն չի լինելու, ինչը փարատում է Թեհրանի հիմնական մտահոգությունները։ Միևնույն ժամանակ նա ընդգծել է, որ Ադրբեջանը, լինելով ՄԱԿ-ի լիիրավ անդամ, ուներ COP17-ին մասնակցելու բոլոր հնարավորությունները, և որևէ նոր լարվածություն չկա, որը հիմք կտար չգալու։
Հիմնական թեմաներն ու պարզաբանումները.
Ադրբեջանի բացակայությունը COP17-ին.
Հարցին, թե ինչու Ադրբեջանից ներկայացուցիչ չի եկել, Միրզոյանը պատասխանել է․ «Չգիտեմ, զանգեք, իրենցից հարցրեք»։
Նա նշել է, որ COP17-ը ՄԱԿ-ի միջոցառում է, ուստի հրավիրել-չհրավիրելը ֆորմալ բնույթ ունի, և Ադրբեջանը կարող էր հանգիստ մասնակցել: Չգալու համար նոր լարվածություն կամ հիմք չկա։
ԹՐԻՓՓ նախագիծը և Իրանի մտահոգությունները.
Միրզոյանի գնահատմամբ՝ հայաստանյան որոշ ԶԼՄ-ներում Իրանի մտահոգությունները «էականորեն ուռճացված են»։
Ամերիկյան ներկայություն. Իրանական կողմի հարցին, թե արդյոք ԹՐԻՓՓ-ի երկայնքով լինելու է ամերիկյան զինված ներկայություն, հայկական կողմը տվել է հստակ բացասական պատասխան․ «Չի լինելու։ Թղթերը այդ մասին են վկայում, իրականությունը այդ մասին է վկայում»։
Իրանական կողմը, ըստ նախարարի տպավորության, բավարարված է այս պատասխանով և պատրաստ է օգտագործել այդ երկաթուղային ցանցը:
Երրորդ ուժերի զինված ներկայությունը.
Անդրադառնալով Իրանի մեջլիսի նախագահ Մոհամմադ Բաղեր Ղալիբաֆի հայտարարությանը՝ արտատարածաշրջանային ուժերի միջամտության մասին, Միրզոյանն ասել է, որ դա դասագրքային ճշմարտություն է․ «Երրորդ կողմի զինված ներկայությունը մեկ այլ տեղ երկուսի հարաբերություններում միայն բարդացնելու է այն երկուսի կյանքը»։
