ԱՄՆ-ն ցանկանում է ԱԲ ներդնել օդային գործողությունների կառավարման համակարգերում․ Defense News

Առաջադեմ տեխնոլոգիաների և մեքենայական ուսուցման ներդրումը կօգնի ավելի արդյունավետորեն հակազդել անօդաչու թռչող սարքերից աճող սպառնալիքին։

ԱՄՆ բանակը նախատեսում է օգտագտել արհեստական բանականության (ԱԲ) տեխնոլոգիաները՝ մարտի դաշտում օդային տարածքի կառավարման արդյունավետությունը բարձրացնելու համար։ Այս մասին հայտնել է Defense News պորտալը՝ հղում անելով պետական գնումների ռեգիստրի փաստաթղթին։

«Տեղեկատվության այս հարցումը նախատեսված է լուծելու այն ճանաչողական բեռը, որի հետ հրամանատարները բախվում են բարդ օդային գործողություններ կառավարելիս», - ասվում է փաստաթղթում։

Տեքստում ընդգծվում է, որ առաջադեմ տեխնոլոգիաների և մեքենայական ուսուցման ներդրումը կօգնի ավելի արդյունավետորեն հակազդել անօդաչու թռչող սարքերից աճող սպառնալիքին։

ԱՄՆ բանակը պատասխաններ է ակնկալում ինչպես արհեստական բանականության լուծումներ մատակարարող ընկերություններից, այնպես էլ այն ընկերություններից, որոնք պատրաստ են տրամադրել արհեստական բանականության տեխնոլոգիաների ինտեգրման երկարաժամկետ հայեցակարգեր։

Այսպիսով, ԱՄՆ ցամաքային ուժերը ցանկանում են հաշվի առնել մի քանի գործոն. միաժամանակյա դիմակայություն ցամաքում, օդում և ջրի վրա, հակառակորդի կողմից անօդաչու թռչող սարքերի լայնածավալ կիրառում, օդային տարածքի գերբեռնվածություն տարբեր տեսակի օբյեկտներով և մեծ քանակությամբ տվյալների վերլուծության հիման վրա արագ որոշումներ կայացնելու անհրաժեշտություն։