Նորոգվել է Գառնառիճ տանող ճանապարհային կամուրջը

Ամասիայի Գառնառիճ բնակավայր տանող ճանապարհին գտնվող կամուրջը, որը նախօրեին մասամբ վնասվել էր, կարճ ժամկետում վերականգնվել է։

Շիրակի մարզպետարանի փոխանցմամբ՝ ահազանգից անմիջապես հետո մարզպետ Դավիթ Առուշանյանի հանձնարարությամբ տեղում եղել են մարզպետի խորհրդականներ Վանիկ Մարտիրոսյանը, Գրիգոր Ավետիսյանը, ինչպես նաև աշխատակազմի ոլորտային պատասխանատուները։

Վնասված հատվածի վերականգնման աշխատանքները իրականացվել են Ամասիայի համայնքապետարանի և «Աշոցքի ԱՏՃ» ՓԲԸ-ի աշխատակիցների համատեղ ջանքերով։ Հատուկ տեխնիկայի օգնությամբ հեռացվել է բետոնատարի վնասված հատվածը, ինչի շնորհիվ ճանապարհի երթևեկությունը վերականգնվել է։

Ներկայում քննարկվում է կամրջի հիմնանորոգման հնարավոր տարբերակների հարցը՝ ճանապարհի անվտանգությունը լիարժեք ապահովելու նպատակով։