ՀՀ էկոնոմիկայի նախարարությունը հյուրընկալել է Շանհայի բիզնես կառույցների ղեկավարներին

Շանհայի պատվիրակությունը քննարկել է հայ-չինական տնտեսական համագործակցության նոր հնարավորությունները:

Հուլիսի 29-ին ՀՀ էկոնոմիկայի նախարարի տեղակալ Էդգար Զաքարյանը հանդիպել է Չինաստանի Շանհայ քաղաքից ժամանած պատվիրակության հետ։

Այցի նպատակն էր քննարկել հայկական ընկերությունների ներգրավումը Շանհայի Ազատ առևտրի գոտում և զարգացնել համագործակցությունը փոխադարձ հետաքրքրություն ներկայացնող նախագծերում։

Շանհայի Պուդոն նոր շրջանի Ազատ գոտին համարվում է Չինաստանի ամենաարագ զարգացող տեխնոլոգիական կենտրոններից մեկը, որտեղ գործում են առաջատար ընկերություններ՝ ռոբոտաշինության, բժշկական սարքավորումների, անօդաչու թռչող սարքերի, անվտանգության և ինժեներական համակարգերի ոլորտներում։

Կողմերը քննարկել են գործարար կապերի խորացման, ներդրումային ծրագրերի իրականացման և արդյունաբերական կլաստերի ստեղծման հնարավորությունները։ Էդգար Զաքարյանը հայտնել է պատրաստակամություն՝ աջակցելու նախաձեռնություններին, որոնք կնպաստեն հայ-չինական տնտեսական համագործակցության ընդլայնմանը։