ԵՄ-ն ծրագրում է 17 միլիարդ եվրոյի դիմաց արդիականացնել երկաթուղային ցանցը

Բրյուսելը նպատակ ունի նաև պարզեցնել սահմանային վարչարարությունը՝ արագացնելով տեխնիկայի և զորքերի տեղաշարժը։

Եվրոպական միության իշխանությունները պատրաստվում են մասշտաբային արդիականացում անցկացնել անդամ պետությունների ճանապարհային և երկաթուղային ենթակառուցվածքներում՝ ռազմական տեխնիկայի և զորքերի արագ տեղափոխումն ապահովելու համար Ռուսաստանի հետ հնարավոր բախման դեպքում։

Ինչպես հաղորդում է Financial Times-ը, ԵՄ տրանսպորտային գործակալության ղեկավար Ապոստոլոս Ցիցիկոստասը նշել է, որ գործող ենթակառուցվածքները՝ կամուրջներն ու թունելները, չեն համապատասխանում ռազմական բեռների տեղափոխման պահանջներին։

Նրա խոսքով՝ մարտական տեխնիկան կարող է պարզապես կլճանալ նեղ անցումներում, քանդել կամուրջները կամ խրվել սահմանային բյուրոկրատիայի մեջ։ ԵՄ-ն նախատեսում է արդիականացնել շուրջ 500 օբյեկտ՝ ԵՄ տարածքով ձգվող չորս ռազմական միջանցքներում։ Ծրագիրը մշակվել է ՆԱՏՕ-ի հետ համատեղ և պահանջում է մոտ 17 միլիարդ եվրո ֆինանսավորում, որը դեռ ենթակա է վերանայման ԵՄ ներսում՝ 2028–2034 թթ. բյուջեի շրջանակում։

Բացի ֆիզիկական ենթակառուցվածքներից, Բրյուսելը նպատակ ունի նաև պարզեցնել սահմանային վարչարարությունը՝ արագացնելով տեխնիկայի և զորքերի տեղաշարժը։

Ցիցիկոստասը նշել է, որ ծրագիրը լրացնում է ՆԱՏՕ-ում պաշտպանական ծախսերը ՀՆԱ-ի 5%-ի հասցնելու համաձայնությունը՝ ընդգծելով՝ «մենք այլևս չենք կարող թույլ տալ լինել անպատրաստ»։

Ծրագրի պաշտոնական շնորհանդեսը նախատեսվում է 2025-ի վերջին։ Այն դիտարկվում է որպես ԵՄ ընդհանուր պաշտպանական ռազմավարության մի մաս՝ պայմանավորված Ուկրաինայի պատերազմով և Եվրոպայում ամերիկյան ռազմական ներկայության հնարավոր կրճատմամբ։