Թրամփին 500 միլիոն դոլար տուգանելու որոշումը ԱՄՆ դատարանը չեղյալ է հայտարարել

2024 թվականի փետրվարին կայացած դատավարության արդյունքում Նյու Յորքի դատարանը Թրամփին 354,9 միլիոն դոլար տուգանք է նշանակել։

Նյու Յորքի վերաքննիչ դատարանը չեղյալ է հայտարարել ԱՄՆ նախագահ Դոնալդ Թրամփի և նրա ընտանեկան բիզնեսի դեմ խարդախության քաղաքացիական հայցով մոտ 500 միլիոն դոլարի տուգանքի որոշումը:

Միևնույն ժամանակ, Թրամփի ընկերության կողմից բանկերին և ապահովագրական ընկերություններին տրամադրված կեղծ փաստաթղթերի վերաբերյալ մեղադրանքները չեն կարճվել, պարզաբանել է պարբերականը:

Թրամփի և նրա երեք երեխաների՝ Էրիկ Թրամփի, Դոնալդ Թրամփ կրտսերի և Իվանկա Թրամփի դեմ քաղաքացիական հայցը 2022 թվականի սեպտեմբերին ներկայացրել է Նյու Յորք նահանգի գլխավոր դատախազ, Դեմոկրատական կուսակցության աջակից Լետիցիա Ջեյմսը: Իվանկա Թրամփի դեմ հայցը հետագայում կարճվել է:

Գործը վերաբերում էր Trump Organization ընկերության ակտիվների գնահատմանը, որը, ինչպես պնդում է դատախազությունը, կանխամտածված ուռճացվել է՝ շահավետ պայմաններով վարկեր ու ապահովագրության պայմանագրեր ստանալու կամ դրանք պահպանելու համար:

2024 թվականի փետրվարին կայացած դատավարության արդյունքում Նյու Յորքի դատարանը Թրամփին 354,9 միլիոն դոլար տուգանք է նշանակել։ Բացի այդ, նրա որդիներին՝ Էրիկ և Դոնալդ Թրամփ կրտսերին, դատարանը մի քանի տարով արգելել է ղեկավար պաշտոններ զբաղեցնել նյույորքյան ընկերություններում:

Դոնալդ Թրամփը գործն անվանել է քաղաքականապես մոտիվացված և 2024 թվականի նոյեմբերին նախագահի ընտրություններում իր հաղթանակից հետո պահանջել էր այն փակել։

Ըստ The New York Times-ի՝ գործն այժմ կուղարկվի Նյու Յորքի Գերագույն դատարան, և քանի որ այն գտնվում է նահանգի իրավասության ներքո, ԱՄՆ նախագահը չի կարող այն փակել կամ ինքն իրեն ներում շնորհել։