Պետական պարտքի սպասարկման բեռը նվազում է․ Հայաստանի ֆինանսական կայունության պատկերը․ ֆինանսների նախարարի պարզաբանումը

Օտարերկրյա ներդրողները մասնակցում են նաև Հայաստանի տեղական աճուրդներին։

ՀՀ ֆինանսների նախարար Վահե Հովհաննիսյանը հայտարարել է, որ 2026 թվականին պետական պարտքի սպասարկման ծախսերը, ամենայն հավանականությամբ, կլինեն պլանավորվածից ավելի ցածր։

«Ինչ գրել ենք 2026 թվականի բյուջեով որպես պարտքի սպասարկման գումար, ամենայն հավանականությամբ կունենանք դրանից ավելի ցածր մակարդակ»,- նշել է նախարարը։

Նրա խոսքով՝ սա պայմանավորված է շուկաների դրական զարգացումներով՝ ինչպես միջազգային մակարդակում, այնպես էլ Հայաստանում։

«Եթե 2024 թվականին 10 տարի մարման ժամկետով գանձապետական պարտատոմսերը թողարկվում էին 9,6 տոկոս տոկոսադրույքով, ապա 2026 թվականին տեղի ունեցած առաջին աճուրդում նույն պարտատոմսերի տոկոսադրույքը կազմել է 8,09 տոկոս»,- ընդգծել է Հովհաննիսյանը։

Ֆինանսների նախարարի գնահատմամբ՝ սա զգալիորեն դրական փոփոխություն է, որը միաժամանակ պայմանավորված է երկու գործոնով՝
մեկ կողմից ՀՀ բանկային համակարգում դրամային լիկվիդայնության աճով,
մյուս կողմից՝ Հայաստանի նկատմամբ միջազգային ինստիտուցիոնալ ներդրողների շարունակվող հետաքրքրությամբ։

Նախարարը նշել է, որ օտարերկրյա ներդրողները մասնակցում են նաև Հայաստանի տեղական աճուրդներին, ինչը դրական ազդեցություն է ունենում տոկոսադրույքների նվազման վրա։

«Սա այն քաղաքականությունն է, որի մասին տարիներ շարունակ խոսել եմ՝ Հայաստան օտարերկրյա ներդրողներ ներգրավելու անհրաժեշտության մասին, և փաստացի այս պահին այդ գործընթացը տեղի է ունենում»,- եզրափակել է Վահե Հովհաննիսյանը։