Եվրամիության անդամ երկրների արտաքին գործերի նախարարները հուլիսի 13-ին կայանալիք նիստում առանցքային անդրադարձ կկատարեն Սևծովյան տարածաշրջանի վերաբերյալ ԵՄ նոր ռազմավարության իրականացման ընթացքին։ Ուղիղ մեկ տարի առաջ ստարտարկած այս հայեցակարգի կենտրոնում անվտանգության, տրանսպորտային փոխկապակցվածության և Հարավային Կովկասի երկրների հետ գործընկերության խորացման հարցերն են։
Բրյուսելի աշխարհաքաղաքական հայացքը և «Միջին միջանցքը»
Ռուսաստանի կողմից Ուկրաինայի դեմ շարունակվող պատերազմի ֆոնին, Բրյուսելը Սևծովյան տարածաշրջանը դիտարկում է որպես եվրոպական անվտանգության, էներգետիկ կայունության և առևտրային հանգույցների առանցքային տարր։
Կովկասյան վեկտորը. Եվրամիությունը Հարավային Կովկասը գնահատում է որպես Եվրոպայի, Կովկասի և Կենտրոնական Ասիայի միջև տրանսպորտային ու էներգետիկ նոր համակարգի կարևորագույն օղակ: Ռազմավարության մեջ հատուկ շեշտադրված է «Միջին միջանցքի» (Middle Corridor) զարգացումը, որը Եվրոպայի համար առևտրային և լոգիստիկ ուղիների դիվերսիֆիկացման գլխավոր առաջնահերթություններից է:
Խաղաղության պայմանագիրը և Թուրքիայի գործոնը
Եվրոպական դիվանագիտությունը տարածաշրջանի երկարաժամկետ կայունությունն ու տնտեսական թռիչքը ուղղակիորեն կապում է Հայաստանի և Ադրբեջանի միջև վերժնական խաղաղության համաձայնագրի կնքման հետ։ Բրյուսելի համոզմամբ՝ դա նոր դռներ կբացի խոշոր ներդրումների և տրանսպորտային կապերի գլոբալ զարգացման համար:
Ինչ վերաբերում է Անկարային, ապա ռազմավարության մեջ Թուրքիային հատկացված է առանձնահատուկ տեղ։ Չնայած արտաքին քաղաքականության մի շարք հարցերում ԵՄ-ի և Թուրքիայի միջև առկա տարաձայնություններին, Բրյուսելը նրան դիտարկում է որպես Սևծովյան ավազանի առանցքային դերակատար և անվտանգության ու էներգետիկայի ոլորտում անփոխարինելի գործընկեր:
Հուլիսի 13-ի նիստում նախարարները կփորձեն քաղաքական հայեցակարգը վերածել կոնկրետ, գործնական նախագծերի փաթեթի:
