1. Ադրբեջանը և Բելառուսը ընդլայնում են ռազմարդյունաբերական համագործակցությունը
Բելառուսի ռազմարդյունաբերական պետական կոմիտեի նախագահն աշխատանքային այցով մեկնել է Բաքու: Ադրբեջանի պաշտպանության նախարար Զաքիր Հասանովի հետ հանդիպման ընթացքում կողմերը քննարկել են ռազմական ոլորտում տեխնոլոգիաների փոխանակման, ինչպես նաև ժամանակակից ռազմական արտադրանքի փոխադարձ մատակարարումների ընդլայնման հարցեր։
2. Պուտինը սահմանափակել է ՌԴ վառելիքաէներգետիկ համալիրի վերաբերյալ տվյալների հրապարակումը
Ռուսաստանի նախագահ Վլադիմիր Պուտինը հրամանագիր է ստորագրել, որով սահմանափակվում է ԶԼՄ-ներով և ինտերնետով ՌԴ էներգետիկ համալիրի վերաբերյալ տվյալների տարածումը:
Սահմանափակումները. Այս որոշումը վերաբերում է էներգակիրների արտահանման ծավալներին, գներին, մատակարարման երթուղիներին, փոխադրողներին, պայմանագրերի հաշվարկներին, ինչպես նաև նավթավերամշակման գործարանների արտադրության ու վերամշակման ծավալներին:
Պատճառը. ՌԴ իշխանություններն այս քայլը հիմնավորել են ԱՄՆ-ի և նրա դաշնակիցների «ոչ բարեկամական» գործողություններով:
3. Հեռախոսների ներմուծման վերաբերյալ օրենքի նախագծի ընդունումը հետաձգվում է
ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը ԱԺ տնտեսական հարցերի մշտական հանձնաժողովի նիստում հայտնել է, որ հեռախոսների ներմուծմանը վերաբերող խնդրահարույց օրենքի նախագծի ընդունումը հետաձգվում է:
4. Երևանի հարավային մուտքի՝ Նորագավիթի տրանսպորտային հանգույցը կվերակառուցվի
Երևանի քաղաքապետարանը մեկնարկել է Արտաշատի խճուղի – Նորագավիթ 1-ին փողոց խաչմերուկի վերակառուցման շինարարական մոբիլիզացիան: Նախագծի ընթացքին տեղում ծանոթացել է քաղաքապետ Տիգրան Ավինյանը:
Լուծումները. Քաղաքի ամենածանրաբեռնված հատվածներից մեկում երթևեկությունը կազմակերպվելու է տարբեր մակարդակների վրա. քաղաք մտնող, դուրս եկող և տարանցիկ հոսքերը լրիվ կտարանջատվեն:
Բյուջեն և ժամկետները. Ծրագրի ընդհանուր արժեքը կազմում է շուրջ 1.5 միլիարդ դրամ, իսկ շինարարության տևողությունը՝ 16 ամիս:
5. ԿԲ-ում ներկայացվել են «Հայաստանի կլիմայական ռիսկերի քարտեզներ» ծրագրի արդյունքները
ՀՀ Կենտրոնական բանկում ներկայացվել են Ասիական զարգացման բանկի (ԱԶԲ) աջակցությամբ իրականացված «Հայաստանի կլիմայական ռիսկերի քարտեզներ» ծրագրի արդյունքները:
Նպատակը. Ծրագիրը տրամադրում է կլիմայական ֆիզիկական ռիսկերի գնահատման միասնական, տվյալահեն գործիքակազմ, որը կօգտագործվի ինչպես վարկավորման որոշումների, այնպես էլ կանխարգելիչ, սոցիալական ու ֆինանսական ծրագրերի մշակման համար:
