Սեպտեմբերի 29-ի բիզնես լուրերը

Տեղական

Երևանում կգործարկվեն 250 նոր էլեկտրական ավտոբուսներ
Մոտ 98 մլրդ դրամի ֆինանսավորմամբ Երևանը ձեռք կբերի 250 էլեկտրական ավտոբուս։ Քաղաքապետ Տիգրան Ավինյանի խոսքով՝ ծրագիրը լուծելու է և՛ տրանսպորտի արդիականացման, և՛ օդի աղտոտվածության խնդիրները։

Թեթև արդյունաբերության խնդիրները՝ նախարարության ուշադրության կենտրոնում
Էկոնոմիկայի նախարարության նախաձեռնությամբ քննարկվել են տեքստիլ և թեթև արդյունաբերության խնդիրները։ Ներկայացվել են պետական աջակցության նոր ծրագրեր, այդ թվում՝ վարկերի տոկոսադրույքների սուբսիդավորում և միջազգային ցուցահանդեսների մասնակցության ֆինանսավորում։

Վերին Լարսով բեռնափոխադրումների նոր կարգ
2025-ի հոկտեմբերի 1-ից ՀՀ բեռնափոխադրողներն էլեկտրոնային հարթակում պետք է ամրագրեն Վերին Լարսի անցակետ ժամանման օրն ու ժամը։ Նոր համակարգը նպատակ ունի նվազեցնել հերթերն ու ապահովել անցման ավելի արդյունավետ գործընթաց։

Անձնական օգտագործման ապրանքների մաքսային ձևակերպումը՝ մեկ վայրում
Հոկտեմբերի 1-ից ֆիզիկական անձանց անունով ներմուծված ապրանքների մաքսային ձևակերպումները կկենտրոնացվեն մեկ վայրում։ Նոր համակարգը կբարելավի քաղաքացիների սպասարկման գործընթացը։

Սրտամկանի ինֆարկտի բուժման պետական ծրագիրը ընդլայնվել է
«Ստենտ՝ կյանքի համար» ծրագիրը այսուհետ ներառելու է բոլոր տեսակի սրտամկանի ինֆարկտները։ Ավելի շատ պացիենտներ կարող են անվճար վիրահատվել պետական պատվերով։

Միջազգային

Մեծ Բրիտանիայում խստացվում են մշտական բնակության պայմանները
Կառավարությունը նախատեսում է նոր կանոններ, ըստ որոնց՝ միգրանտները պետք է ապացուցեն իրենց ներդրումը հասարակության մեջ՝ անգլերենի տիրապետմամբ, հարկային վճարումներով և կամավորական աշխատանքով։

ԵՄ-ն մասամբ վերականգնել է Իրանի դեմ պատժամիջոցները
ԵՄ-ն որոշել է վերականգնել 2015-ին կասեցված պատժամիջոցների մի մասը։ Դրանք վերաբերում են առևտրի, ֆինանսների և տրանսպորտի ոլորտներին, ինչպես նաև անհատական սահմանափակումներին։

ԱՄՆ-ը վերացրել է ԵՄ-ից ներմուծվող ադամանդների մաքսատուրքը
Վաշինգտոնը չեղարկել է ԵՄ-ից ներմուծվող ադամանդների 15% մաքսատուրքը։ Որոշումը պայմանավորված է այն փաստով, որ ԱՄՆ-ում բացակայում են ադամանդի արդյունահանման ու մշակման ոլորտները։

Հետաքրքիր

Բնապահպանական խնդիրների պատճառով Եվրոպան կորցրել է 162 մլրդ եվրո
Վերջին երեք տարում բնապահպանական խնդիրները ԵՄ տնտեսությանը հասցրել են 162 մլրդ եվրոյի կորուստ։ Հիմնական պատճառներն են հողերի դեգրադացիան և ջրամբարների անբավարար վիճակը։