Google-ում հայտնվել են Grok չաթբոթի անձնական զրույցները

Հարյուր հազարավոր օգտատերերի անձնական զրույցները դարձել են հասանելի Google-ում:

Իլոն Մասկի արհեստական բանականության Grok չաթբոթի օգտատերերի հարյուր հազարավոր զրույցներ անսպասելիորեն հայտնվել են որոնողական համակարգերում՝ առանց նրանց գիտության։

Պարզվել է, որ երբ օգտատերերը սեղմում էին կիսման կոճակը, նրանց զրույցի համար ստեղծվում էր հատուկ հղում։ Բայց այդ հղումները միայն ընկերների հետ կիսվելու փոխարեն հայտնվել են նաև Google-ում։ Forbes-ի տվյալներով՝ ինտերնետում հասանելի է արդեն շուրջ 370,000 զրույց։

BBC-ի կողմից տեսած զրույցների մեջ կային հարցումներ՝ ինչպես ստեղծել անվտանգ գաղտնաբառ, կազմել սննդակարգ, պատասխանել բժշկական հարցերին։ Որոշ զրույցներում օգտատերերը փորձել էին ստուգել Grok-ի սահմանները, իսկ մեկ դեպքում այն նույնիսկ տվել էր թմրանյութ պատրաստելու հրահանգներ։

Փորձագետները սա անվանում են «գաղտնիության աղետ»։ Նրանց խոսքով՝ չնայած օգտատերերի անունները կարող են թաքցված լինել, հարցումները հաճախ պարունակում են անձնական տվյալներ՝ առողջության, բիզնեսի կամ հարաբերությունների մասին։ Իսկ երբ դրանք հայտնվում են առցանց, «մնում են այնտեղ հավերժ»։

Նմանատիպ խնդիրներ եղել են նաև այլ ընկերությունների մոտ։ Վերջերս OpenAI-ն և Meta-ն քննադատության էին ենթարկվել, երբ իրենց չաթբոթերի կիսված զրույցները հանրային տարածք էին դուրս եկել։

Օքսֆորդի համալսարանի մասնագետ Կարիսա Վելիզը ընդգծել է․
«Մեր տեխնոլոգիան չի բացատրում՝ ինչ է անում մեր տվյալների հետ, և դա լուրջ խնդիր է»։