ՊԵԿ-ում ներկայացվել է Մեղրիի անցակետի վերակառուցման և արդիականացման ծրագիրը

Պետական եկամուտների կոմիտեի նախագահ Էդուարդ Հակոբյանի գլխավորությամբ տեղի է ունեցել ՊԵԿ ենթակառուցվածքների և վարչական շենքերի կառուցման ու արդիականացման խորհրդի նիստը։

ՊԵԿ-ից հայտնում են, որ նիստի ընթացքում ներկայացվել է Մեղրիի անցակետի վերակառուցման և արդիականացման ծրագիրը, քննարկվել են ծրագրի շրջանակում իրականացվող շինարարական աշխատանքների ընթացքը և առկա խնդիրները, դրանց հնարավոր լուծումները, ֆինանսական ռիսկերն ու կանխարգելման մեխանիզմները։

Միաժամանակ անդրադարձ է եղել ՊԵԿ ենթակառուցվածքների և վարչական շենքերի կառուցմանն ու արդիականացմանն ուղղված այլ ընթացիկ ծրագրերին, մասնավորապես՝ Երևանի և Սյունիքի մաքսային և լոգիստիկ կենտրոնների կառուցման ծրագրերի ընթացքին, ինչպես նաև այդ ծրագրերի իրականացման հետ կապված խնդիրներին և կենտրոնների LEED հավաստագրմանն (կանաչ շենքերի գնահատման համակարգին) առնչվող հարցերին։ Սահմանվել են նաև ծրագրերի ընթացակարգերով նախատեսված առաջիկա քայլերը։

Ամփոփելով նիստը ՊԵԿ նախագահն ընդգծել է ծրագրերի շրջանակում գործընթացների կազմակերպման արդյունավետությունն ու որակի նկատմամբ շարունակական վերահսկողությունը։ Կարևորվել են նաև ՊԵԿ ենթակառուցվածքների շարունակական զարգացումը և արդյունավետ կառավարումը՝ բարձր որակի չափանիշներին համահունչ։