ՊԵԿ-ը բացահայտել է խոշոր չափերի կանխիկ արտարժույթի ներկրման և ստվերային շրջանառության դեպքեր (տեսանյութ)

Առանձին դեպքերում քաղաքացիները պարբերաբար ներմուծել են 18-ից մինչև 100 մլն ռուբլու չափով կանխիկ գումարներ։

ՀՀ պետական եկամուտների կոմիտեն ուժեղացրել է օդային և ցամաքային սահմաններով Հայաստան տեղափոխվող կանխիկ դրամական միջոցների վերահսկողությունը՝ ֆինանսական թափանցիկության բարձրացման և իրավախախտումների կանխարգելման նպատակով։

ՊԵԿ հետաքննության և օպերատիվ հետախուզության վարչության իրականացրած միջոցառումների արդյունքում ստացվել են տվյալներ, համաձայն որոնց՝ մի շարք քաղաքացիներ օդային ճանապարհով Հայաստան են տեղափոխել ընդհանուր շուրջ 113 մլն ռուսական ռուբլի կանխիկ միջոցներ։

«Զվարթնոց» օդանավակայանում նշված անձինք արգելանքի են վերցվել՝ ՀՀ քրեական օրենսգրքով նախատեսված հանցանքի հիմնավոր կասկածի հիմքով, ապա տեղափոխվել ՊԵԿ համապատասխան վարչություն, որտեղ ձերբակալվել են։

Օպերատիվ տվյալներով՝ առանձին դեպքերում քաղաքացիները պարբերաբար ներմուծել են 18-ից մինչև 100 մլն ռուբլու չափով կանխիկ գումարներ, որոնք հետագայում տրամադրվել են Երևանում գործող որոշ արտարժույթի փոխանակման կետերի։ Կանխիկ միջոցները փոխանակվել են ԱՄՆ դոլարի՝ առանց անհրաժեշտ փաստաթղթավորման, և հետագայում արտահանվել։

Տեղեկությունները փոխանցվել են ՀՀ կենտրոնական բանկ՝ վարչական պատասխանատվության և հետագա կարգավորման հարցերի քննարկման նպատակով։

Կատարված վերլուծությունների համաձայն՝ առկա են ռիսկեր, որ նման գործարքները կարող են օգտագործվել հարկվող գործունեության ծավալների թաքցման և ստվերային շրջանառության ձևավորման համար։

Գործը գտնվում է ընթացքի մեջ։ Մեղադրվող անձինք համարվում են անմեղ, քանի դեռ նրանց մեղավորությունը չի ապացուցվել դատարանի՝ օրինական ուժի մեջ մտած դատավճռով։