Հոկտեմբերի 7-ի բիզնես լուրերը

Տեղական

Նախագործարկվել է քաղաքացիության գործերի էլեկտրոնային կառավարման համակարգը
ՆԳՆ-ի նոր հարթակը թույլ կտա քաղաքացիներին առցանց գրանցվել, ներկայացնել քաղաքացիություն ստանալու կամ դադարեցնելու հայտեր և ամրագրել այցելության օր։ 2026թ․ հունվարի 1-ից դիմումների ընդունումն ու հերթագրումը կիրականացվի բացառապես էլեկտրոնային եղանակով։

Առևտրի շրջանառությունը 8 ամսում կազմել է ավելի քան 4 տրլն դրամ
Հայաստանում 2025-ի հունվար-օգոստոսին առևտրի ընդհանուր շրջանառությունը կազմել է 4.14 տրլն դրամ՝ աճելով 3.9%-ով։ Մանրածախ առևտուրը աճել է 4.6%-ով, իսկ մեծածախը՝ 3.4%-ով։

Ավտոմեքենաների առևտրի շրջանառությունն աճել է 6%-ով
Ավտոմեքենաների, դրանց մասերի և տեխնիկական սպասարկման առևտրի ծավալը կազմել է 163 մլրդ դրամ։ Տվյալները ներկայացրել է Վիճակագրական կոմիտեն։

Սեպտեմբերին պետական պարտատոմսերի տեղաբաշխումը հասել է 43.2 մլրդ դրամի
ՀՀ ֆոնդային բորսայի առաջնային աճուրդում պարտատոմսերի ծավալը ավելացել է 24%-ով՝ հասնելով 43.2 մլրդ դրամի։ Երկրորդային շուկայում գործարքների ծավալը աճել է գրեթե հնգապատիկ։

Հայկական կոնյակի արտադրությունը նվազել է 34%-ով
2025-ի հունվար-օգոստոսին կոնյակի արտադրության ծավալները կազմել են 8.37 մլն լիտր՝ նախորդ տարվա համեմատ նվազելով 34.4%-ով։

Միջազգային

ԱՄՆ պետական պարտքը երկու օրում աճել է 360 մլրդ դոլարով
Պարտքը հասել է ավելի քան 37 տրիլիոն դոլարի։ ԱՄՀ-ն նախազգուշացնում է, որ ԱՄՆ պարտքը շարունակում է մնալ գլոբալ տնտեսության գլխավոր ռիսկը։

Իրանը հայտնաբերել է նավթի և գազի նոր պաշարներ
Նոր հանքավայրի շահագործման պայմանագիրն արդեն ստորագրվել է։ Արտադրությունը նախատեսվում է սկսել 40 ամսվա ընթացքում։

ԱՄՆ-ը մաքսատուրքեր է սահմանելու բեռնատարների ներմուծման վրա
Նոյեմբերի 1-ից ուժի մեջ կմտնի Դոնալդ Թրամփի որոշումը՝ արտաքին արտադրող բեռնատարների նկատմամբ մաքսային նոր սահմանափակումների կիրառման վերաբերյալ։

ԵՄ-ն առաջարկում է 50% սակագին պողպատի ներմուծման համար
Նպատակն է պաշտպանել եվրոպական արտադրությունը։ Միջոցառումը կարող է լուրջ ազդեցություն ունենալ նաև Մեծ Բրիտանիայի տնտեսության վրա։