Հոկտեմբերի 17-ի կարևոր լուրերը

Վեհափառ Արամ Ա․ դատապարտում է հոգեւորականների ձերբակալությունները

Մեծի Տանն Կիլիկիո կաթողիկոս Արամ Ա․ Վեհափառը հայտարարությամբ արձագանքել է հայ հոգեւորականների շարունակվող ձերբակալություններին՝ դրանք որակելով «ոչ ընդունելի երեւույթ»։ Նա նշել է, որ դեռ ամիսներ առաջ է նախազգուշացրել նման գործընթացների վտանգների մասին և հորդորել է դադարեցնել դրանք։ Վեհափառը հանձնարարել է իր մտահոգությունն ու դիրքորոշումը փոխանցել ՀՀ իշխանություններին, այդ թվում՝ վարչապետին՝ շեշտելով, որ պետություն–եկեղեցի հարաբերությունները պետք է շուտափույթ կարգավորվեն՝ ի շահ ազգի և հայրենիքի։

Փաստաբան Ալեքսանդր Կոչուբաևը կալանավորվեց

Փաստաբան Ալեքսանդր Կոչուբաևը կալանավորվել է երկու ամսով։ Քննչական կոմիտեն հայտնել է, որ նրան մեղադրանք է առաջադրվել Քրեական օրենսգրքի 490-րդ հոդվածի 2-րդ մասով։ Կոչուբաևը հայտնի է որպես Ռոբերտ Քոչարյանի և Բագրատ Սրբազանի գործերով պաշտպաններից մեկը։ Նրա կալանավորումը իրավաբանական հանրության շրջանում առաջացրել է մեծ արձագանք։

ԱՄՆ հատուկ բանագնացը վերահաստատել է աջակցությունը խաղաղությանը

Թրամփի հատուկ բանագնաց Սթիվ Ուիթքոֆը հանդիպել է Հայաստանում ԱՄՆ դեսպան Նարեկ Մկրտչյանի հետ։ Զրույցի ընթացքում քննարկվել են Հարավային Կովկասի կայունության նախաձեռնությունները, ինչպես նաև օգոստոսի 8-ին ձեռք բերված համաձայնագրերի իրականացման ընթացքը։ Ուիթքոֆը կրկին ընդգծել է ԱՄՆ պատրաստակամությունը՝ աջակցելու տարածաշրջանային խաղաղ գործընթացին։

Բաքվում շարունակվում է կեղծ դատավարությունը հայ ռազմագերիների նկատմամբ

Բաքվի դատարանում, անկախ լրատվամիջոցների և միջազգային կառույցների բացակայությամբ, շարունակվել է Արցախի նախկին ղեկավարների և գերիների գործով դատավարությունը։ Նիստի ընթացքում ուսումնասիրվել են 1990–2000-ականների կամավորական ջոկատների վերաբերյալ փաստաթղթեր՝ ներառյալ «Խաչակիրներ», «Սասնա ծռեր», «Երկրապահ» և այլ խմբեր։ Գործը կշարունակվի այսօր։

Պուտին–Թրամփ հեռախոսազրույց՝ Tomahawk հրթիռների թեմայով

Վլադիմիր Պուտինն ու Դոնալդ Թրամփը հեռախոսազրույց են ունեցել՝ քննարկելով Ուկրաինային 1600 կմ հեռահարությամբ Tomahawk հրթիռների մատակարարման հնարավորությունը։ Պուտինը նշել է, որ նման քայլը կվնասի ռուս-ամերիկյան հարաբերություններին և կխոչընդոտի խաղաղ կարգավորմանը։

Ջոն Բոլթոնը կանգնելու է դատարանի առաջ

ԱՄՆ նախկին ազգային անվտանգության խորհրդական Ջոն Բոլթոնը մեղադրվում է գաղտնի տեղեկատվության ապօրինի փոխանցման մեջ։ Նրան սպառնում է երկարաժամկետ ազատազրկում։ Բոլթոնը հերքում է մեղադրանքները՝ հայտարարելով, որ գործը քաղաքական ենթատեքստ ունի։

Ռոնալդուն՝ աշխարհի ամենաբարձր վարձատրվող ֆուտբոլիստը

Cristiano Ronaldo-ն դարձել է 2025-ի ամենաբարձր վարձատրվող ֆուտբոլիստը՝ տարեկան 280 միլիոն դոլար եկամուտով։ Նրան հաջորդում է Լիոնել Մեսսին՝ 130 միլիոնով, և Կարիմ Բենզեման՝ 104 միլիոնով։ Ռոնալդուի եկամտի 230 միլիոնը կազմվել է խաղադաշտում, իսկ 50 միլիոնը՝ գովազդային պայմանագրերից։

Աղքատության մակարդակը Հայաստանում նվազել է

Հոկտեմբերի 17-ին նշվող Աղքատության վերացման միջազգային օրվա կապակցությամբ հրապարակվել են տվյալներ՝ համաձայն որոնց, 2023-ին աղքատության մակարդակը Հայաստանում կազմել է 23.7%՝ նվազելով 1.1 տոկոսային կետով։ Ծայրահեղ աղքատությունն էլ նվազել է՝ հասնելով 1.1%-ի։ Զարուհի Բաթոյանը նշել է, որ աղքատության հաղթահարման առանցքում պետք է լինեն մատչելի ծառայությունները և խտրականության բացակայությունը։

ԱՄՆ փոխնախագահը՝ Ուկրաինայի հարցով բանակցությունների մասին

ԱՄՆ փոխնախագահ Ջեյ Դի Վենսը հայտարարել է, որ ո՛չ Ռուսաստանը, ո՛չ էլ Ուկրաինան դեռ պատրաստ չեն խաղաղության համաձայնագիր ստորագրելուն։ Նա ընդգծել է, որ Թրամփի և Պուտինի վերջին հեռախոսազրույցը եղել է «շատ արդյունավետ», և որոշում է կայացվել հանդիպել Հունգարիայում՝ Ուկրաինայի հակամարտության կարգավորման հարցով բանակցություններ վարելու համար։

ԵԱՏՄ հանձնաժողովը խոստանում է լուծել վարորդների խնդիրները

Եվրասիական տնտեսական հանձնաժողովը քննարկում է Ռուսաստանի տարածքում ԵԱՏՄ երկրների բեռնափոխադրողների մուտքի սահմանափակումների վերացման հնարավորությունը։ Խնդիրը առաջացել է նոր միգրացիոն կանոնների պատճառով, որոնք սահմանափակում են վարորդների մնալու ժամկետները։

ԵՄ-ն պատրաստ է աջակցել «Թրամփի ուղի» նախագծերին

ԵՄ դեսպան Վասիլիս Մարագոսը հայտարարել է, որ Եվրամիությունը պատրաստ է աջակցել «Թրամփի ուղի» և «Խաղաղության խաչմերուկ» նախագծերի իրագործմանը։ Նրա խոսքով՝ ԵՄ-ն հուսալի գործընկեր է Հայաստանի կառավարության համար՝ ենթակառուցվածքային և էներգետիկ ծրագրերի ոլորտում։

Թրամփը՝ երրորդ համաշխարհային պատերազմի հավանականության մասին

ԱՄՆ նախագահ Դոնալդ Թրամփը վստահեցրել է, որ Ուկրաինայի պատերազմը չի հանգեցնի երրորդ համաշխարհային պատերազմի։ Նրա խոսքով՝ միայն վերջին շաբաթն է պատերազմում զոհվել ավելի քան 7 հազար մարդ։

Ձերբակալվել է Իջևանի նախկին քաղաքապետ Վարուժան Ներսիսյանը

Հակակոռուպցիոն կոմիտեն ձերբակալել է Իջևանի նախկին քաղաքապետ Վարուժան Ներսիսյանին՝ փողերի լվացման և լիազորությունների չարաշահման մեղադրանքով։ Ձերբակալվել է նաև նրա որդին։ Քննչական մարմինները շարունակում են նախաքննությունը։

ՄԻՊ-ը՝ փաստաբան Կոչուբաևի կալանքի մասին

Մարդու իրավունքների պաշտպանը հայտարարել է, որ խոսքի համար ազատազրկումն անթույլատրելի է առանց ծանր հիմնավորումների։ ՄԻՊ ներկայացուցիչները տեսակցել են Կոչուբաևին՝ նշելով, որ կալանքը պետք է կիրառվի բացառիկ դեպքերում։

Կացության կարգավիճակների տրամադրումը կթվայնացվի

Կառավարությունը հավանություն է տվել ՆԳՆ առաջարկին՝ թվայնացնել օտարերկրացիներին կացության կարգավիճակի տրամադրման բոլոր ընթացակարգերը։ Կսահմանվեն միայն երկու կարգավիճակ՝ ժամանակավոր և մշտական։ Նոր համակարգը ներառելու է նաև աշխատանքային վիզա և քվոտավորման մեխանիզմ՝ ԵՄ չափանիշներին համապատասխան։

Էկոնոմիկայի նախարար Գևորգ Պապոյանի տվյալներով՝ արդեն մթերվել է շուրջ 192 հազար տոննա խաղող՝ գերազանցելով անցած տարվա նույն ցուցանիշը։ Տեխնիկական սորտերի մթերումն էլ կազմում է մոտ 3 հազար տոննա։

Nestlé-ն կկրճատի 16 հազար աշխատատեղ

Շվեյցարական Nestlé ընկերությունը նախատեսում է առաջիկա երկու տարում կրճատել 16,000 աշխատատեղ ամբողջ աշխարհում՝ ծախսերը նվազեցնելու նպատակով։ Կրճատումների հիմնական մասը նախատեսված է արտադրությունում և մատակարարման շղթաներում։

ԵՄ ներդրումները Հայաստանում կհասնեն 2.5 միլիարդ եվրոյի

ԵՄ դեսպան Վասիլիս Մարագոսը հայտարարել է, որ ԵՄ-ի ներդրումները Հայաստանում կհասնեն 2.5 միլիարդ եվրոյի։ Ծրագրերը ներառում են Սիսիան–Քաջարան մայրուղու, «Կանաչ Երևանի», տրանսպորտային բարեփոխումների և էներգետիկ ծրագրերի իրականացում։

Մեծ Բրիտանիան տեսնում է Հայաստան՝ որպես տարածաշրջանային բիզնես հանգույց

Մեծ Բրիտանիայի դեսպան Ալեքսանդրա Քոուլը նշել է, որ Հայաստանը դառնում է դինամիկ և գրավիչ վայր միջազգային բիզնեսի համար՝ իր աշխարհագրական դիրքի և բարեփաստ միջավայրի շնորհիվ։

Անշարժ գույքի շուկայում ակտիվություն է գրանցվել

2025թ․ օգոստոսին Հայաստանում կատարվել է 4,542 անշարժ գույքի առուվաճառք։ Ամենաշատ գործարքները՝ 1,563, գրանցվել են Երևանում, ապա՝ Կոտայքում, Արմավիրում և Արարատում։

Վրաստանում կկրճատվի կրթության տևողությունը

Վրաստանը որոշել է կրճատել բակալավրիատը՝ չորսից երեք տարի, մագիստրատուրան՝ երկուսից մեկ։ Դպրոցական կրթությունը ևս կկրճատվի՝ 12-ից 11 տարի։ Այս պահին Վրաստանում սովորում է մոտ 187.8 հազար ուսանող՝ այդ թվում օտարերկրացիներ։

Նոր Զելանդիան վերականգնում է Իրանի դեմ պատժամիջոցները

Նոր Զելանդիան հայտարարեց Իրանի դեմ պատժամիջոցների վերականգնման մասին՝ ուրանի հարստացման պարտավորությունների խախտման պատճառով։ Պատժամիջոցները ներառում են ֆինանսական սահմանափակումներ և մուտքի արգելքներ։

ԵԱՀԿ գործող նախագահին տուգանել են Վրաստանում

Ֆինլանդիայի ԱԳ նախարար և ԵԱՀԿ գործող նախագահ Էլինա Վալտոնենը 5000 լարիով տուգանվել է՝ Ռուսթավելի պողոտան փակելու համար։ Վալտոնենը մասնակցել էր Թբիլիսիում ընդդիմադիր հանրահավաքին, ինչի հետևանքով չեղարկվել էր նրա հանդիպումը Վրաստանի վարչապետի հետ։

Քաղաքապետարանը ապամոնտաժել է Սարյան պուրակի սրճարանը

Երևանի քաղաքապետարանը հատուկ տեխնիկայով ապամոնտաժել է Զորյան 1/1 հասցեում գտնվող սրճարանը՝ այն որակելով ինքնակամ շինություն։ Սրճարանի տնօրենը պնդում է, որ դատական գործընթացը շարունակվում է և ապամոնտաժումը անօրինական է։

Էլեկտրամոբիլների ներմուծման ոլորտում՝ խնդիրներ

Էլեկտրամոբիլների ներմուծմամբ զբաղվողներն ահազանգում են, որ մեքենաների ձիաուժը Հայաստանում սխալ է հաշվարկվում՝ 50-60%–ով ավելի։ Սա հանգեցնում է բարձր գույքահարկի՝ մինչև կրկնակի։

ԱՊՀ երկրների հատուկ ծառայությունները՝ համագործակցության հուշագիր

Սամարղանդում կայացած նիստում ԱՊՀ անդամ պետությունների անվտանգության ծառայությունները ստորագրել են հուշագիր՝ համագործակցության ընդլայնման վերաբերյալ։ Հայաստանը ներկայացրել է Քրիստինե Գրիգորյանը։

Լիբիան ազատ է արձակել Հաննիբալ Քադաֆիին

Լիբիայի նախկին առաջնորդ Մուամմար Քադաֆիի որդին՝ Հաննիբալ Քադաֆին, ազատ է արձակվել 11 միլիոն դոլար գրավի դիմաց։ Նա Լիբանանում կալանքի տակ էր 2015 թվականից։

Հայ փոքրիկը գրանցել է նոր ուժային ռեկորդ

Երկու տարեկան Դավիթը գրանցել է հերթական ռեկորդը՝ քաշելով 210 կգ-անոց երկաթե կցորդիչ։ Փոքրիկը դեռ 11 ամսականում դարձել էր «Դյուցազնագիրքի» ռեկորդակիր՝ հրելով 60 կգ կշռող մանկական մեքենա։