Հոկտեմբերի 17-ի բիզնես լուրերը

Տեղական

Կացության բոլոր կարգավիճակների տրամադրման ընթացակարգերը կթվայնացվեն
Կառավարությունը հավանություն է տվել ՆԳՆ առաջարկին՝ ընդլայնելու օտարերկրացիների համար մատուցվող էլեկտրոնային ծառայությունները։ Կսահմանվեն միայն ժամանակավոր և մշտական կացության կարգավիճակներ, ներդրվելու է քվոտավորման համակարգ և աշխատանքային վիզայի նոր ձևաչափ՝ ԵՄ ստանդարտներին համապատասխանեցման նպատակով։

Հայաստանում խաղողի մթերման ծավալը հասել է 192 հազար տոննայի
Էկոնոմիկայի նախարար Գևորգ Պապոյանի խոսքով՝ այս տարի խաղողի մթերումները զգալիորեն աճել են․ նախորդ տարվա 160 հազար տոննայի փոխարեն մթերվել է արդեն 192 հազար տոննա, այդ թվում՝ մոտ 3 հազար տոննա տեխնիկական սորտեր։

Եվրամիության ներդրումները Հայաստանում կհասնեն 2.5 միլիարդ եվրոյի
ԵՄ դեսպան Վասիլիս Մարագոսի խոսքով՝ ծրագրերը ներառում են Սիսիան–Քաջարան մայրուղին և թունելը, Երևանի տրանսպորտի բարեփոխումը, «Կանաչ Երևան» նախաձեռնությունը և մանկապարտեզների վերանորոգում։ Ներդրումները կխթանեն կանաչ էներգետիկայի զարգացումը և նոր աշխատատեղերի ստեղծումը։

Հայաստանը դառնում է դինամիկ և գրավիչ վայր միջազգային բիզնեսի համար․ Քոուլ
Մեծ Բրիտանիայի դեսպան Ալեքսանդրա Քոուլի խոսքով՝ Հայաստանի աշխարհագրական դիրքը այն դարձնում է կարևոր տնտեսական խաչմերուկ։ Բրիտանիան շարունակելու է աջակցել Հայաստանի բիզնես միջավայրի մրցունակության և կենսունակության բարձրացմանը։

Օգոստոսին անշարժ գույքի շուկայում կատարվել է 4542 գործարք
Ամենաշատ գործարքները գրանցվել են Երևանում՝ 1563, իսկ մարզերից՝ Կոտայքում՝ 943։ Գործարքների թիվը վկայում է շուկայի կայուն ակտիվության մասին՝ չնայած գնային աճին։

Միջազգային

Nestlé-ն կկրճատի 16,000 աշխատատեղ՝ ծախսերը նվազեցնելու նպատակով
Շվեյցարական սննդային հսկան նախատեսում է մինչև 2026 թվականը կրճատել ծախսերը 3 միլիարդ ֆրանկով։ Կրճատումները հիմնականում կանդրադառնան արտադրության և մատակարարման շղթաների վրա։

Վրաստանում կկրճատվի դպրոցական և բարձրագույն կրթության տևողությունը
Դպրոցական կրթությունը կդառնա 11 տարի, բակալավրիատը՝ 3, մագիստրատուրան՝ 1 տարի։ Այս փոփոխությունները պայմանավորված են կրթական համակարգի արդիականացմամբ և օտարերկրյա ուսանողների թվի աճով։

Նոր Զելանդիան վերականգնում է Իրանի դեմ պատժամիջոցները
Պատճառը՝ Իրանի կողմից ուրանի հարստացման պայմանավորվածությունների խախտումն է։ Պատժամիջոցները կներառեն ֆինանսական սահմանափակումներ, մուտքի արգելքներ և ակտիվների սառեցում։

Հետաքրքիր

Forbes-ը հրապարակել է 2025-ի ամենաբարձր վարձատրվող ֆուտբոլիստների վարկանիշը
Առաջին տեղում Կրիշտիանու Ռոնալդուն է՝ 280 մլն դոլար եկամուտով։ Նրան հաջորդում են Լիոնել Մեսսին՝ 130 մլն դոլարով և Կարիմ Բենզեման՝ 104 մլն դոլարով։