Տեղական
Վերաֆինանսավորման տոկոսադրույքը կարող է բարձրանալ մինչև 7.25%. ԵԶԲ
Հոկտեմբերին Հայաստանում տարեկան գնաճը կազմել է 4.3%, իսկ պարենային ապրանքների գնաճը դանդաղել է մինչև 5.6%: Եվրասիական զարգացման բանկը (ԵԶԲ) կանխատեսում է, որ մինչև տարեվերջ գնաճը կհասնի 4.4%-ի, իսկ վերաֆինանսավորման տոկոսադրույքը կբարձրացվի մինչև 7.25%:
Բանակցություններ միջազգային լոգիստիկ ծովային հսկայի հետ
ՀՀ էկոնոմիկայի նախարար Գևորգ Պապոյանի գլխավորած պատվիրակությունը քննարկումներ է ունեցել «Mediterranean Shipping Company» (MSC) ընկերության ներկայացուցիչների հետ: Օրակարգում եղել են Հայաստանը տարածաշրջանային լոգիստիկ հանգույց դարձնելու, ապաշրջափակման համատեքստում բեռնափոխադրումների ծավալներն ավելացնելու և տարանցիկ ներուժն իրացնելու հնարավորությունները:
Հայ-էստոնական տնտեսական կապերի և արտահանման ընդլայնում
ՀՀ ԱԳ նախարար Արարատ Միրզոյանը Էստոնիայի ԱԳ նախարար Մարգուս Ցահքնայի հետ քննարկել է երկկողմ առևտրաշրջանառության աճի և հայկական արտադրանքը Էստոնիա ու եվրոպական այլ շուկաներ արտահանելու հեռանկարները: Անդրադարձ է կատարվել նաև հուլիսին Տալլինում անցկացված «Made in Armenia» ցուցահանդեսին:
Աշխատանքային օրենսդրության ծավալուն փոփոխություններ
Կառավարությունն առաջարկում է փոփոխություններ Աշխատանքային օրենսգրքում և «Նվազագույն ամսական աշխատավարձի մասին» օրենքում: Նախագծերով նախատեսվում է վերանայել ծնողական ժամի տրամադրումը, աշխատաժամանակի (12 կամ 24-ժամյա) գրաֆիկները, անչափահասների աշխատանքի տևողությունը և պայմանագրի էական պայմանների փոփոխման ընթացակարգերը:
Էլեկտրաէներգիայի արտադրության աճ՝ 6.4%-ով
2026թ. հունվար-սեպտեմբերին Հայաստանում արտադրվել է 7,827.0 մլն կՎտ/ժ էլեկտրաէներգիա, ինչը նախորդ տարվա համադրելի ցուցանիշը գերազանցում է 6.4%-ով: Աճին մեծապես նպաստել է ՋԷԿ-երի արտադրությունը, որն ավելացել է 41.9%-ով:
Միջազգային
Կանադայի նոր պատժամիջոցները Ռուսաստանի դեմ
Կանադան ընդլայնել է սահմանափակումների ցանկը՝ Ռուսաստանի դեմ սահմանելով պատժամիջոցներ 38 իրավաբանական և 24 ֆիզիկական անձանց նկատմամբ: Նպատակն է թուլացնել ռուսական ռազմական ներուժը՝ թիրախավորելով նաև ֆինանսական միջնորդներին ու կրիպտոարժույթների բորսաները:
Պարենային հումքի գների կտրուկ աճի կանխատեսում․ Համաշխարհային բանկ
Համաշխարհային բանկի կանխատեսումներով՝ պարենային հումքային ապրանքների համաշխարհային գները 2026 թվականին կաճեն 10.3%-ով, իսկ 2027-ին՝ ևս 7.2%-ով: Հացահատիկային մշակաբույսերի գները 2026թ. կավելանան 14.1%-ով, ընդ որում՝ առավել կտրուկ թանկացում է սպասվում ցորենի շուկայում:
Ուկրաինայի արտաքին ֆինանսավորումը հասել է 212 մլրդ դոլարի
2022 թվականի փետրվարից ի վեր Ուկրաինան ներգրավել է շուրջ 212 մլրդ դոլարի արտաքին աջակցություն, որից 150.269 մլրդ դոլարը՝ վարկեր, իսկ 61.698 մլրդ դոլարը՝ անհատույց դրամաշնորհներ: Երկրի պետական պարտքը հասել է 212.6 մլրդ դոլարի:
Չինաստանում սպառողական գների աճի դանդաղում
Չինաստանում հոկտեմբերին տարեկան գնաճը դանդաղել է մինչև 0.7% (սեպտեմբերի 0.9%-ի համեմատ)՝ գրանցելով հունիսից ի վեր նվազագույն ցուցանիշը: Պարենային ապրանքների գները նվազել են 2.9%-ով՝ էժանանալով արդեն յոթերորդ ամիսն անընդմեջ:
