Նոյեմբերի 12-ի բիզնես լուրերը

Տեղական

ՀՀ պետական պարտքն ավելացել է 80%-ով, սակայն հնարավոր կլինի մարել այն 1,5 տարում։ Այս մասին ԱԺ-ում հայտնել է ֆինանսների նախարար Վահե Հովհաննիսյանը։ Նրա խոսքով՝ 537 մլրդ դրամ (ՀՆԱ-ի 4.5%) պակասուրդը ուղղվում է տնտեսության պոտենցիալի բարձրացմանն ու քաղաքացիների բարեկեցության ընդլայնմանը։

2025թ․ հունվար–սեպտեմբերին բեռնափոխադրումների ընդհանուր ծավալը կազմել է 12,263.3 հազար տոննա՝ 1.6% աճով։ Երկաթուղային բեռնափոխադրումները աճել են 15.7%-ով, ավտոմոբիլայինը՝ նվազել 0.5%-ով, օդայինը՝ աճել 3.2%-ով, իսկ խողովակաշարայինը՝ նվազել 1.8%-ով։

Հոկտեմբերին Հայաստան է այցելել 212,891 զբոսաշրջիկ՝ նախորդ տարվա նույն ամիսը գերազանցելով մոտ 9,000 այցով։ Ամենաշատ այցելուները ՌԴ-ից են (41%), Վրաստանից (12%) և Իրանից (8%)։

ԶՊՄԿ-ն նախատեսում է անցնել այլընտրանքային էներգիայի աղբյուրների։ Ընկերությունը դիտարկում է համակցված մոդել՝ ներառելով արևային, քամու և հիդրոէներգիայի լուծումներ։ Կայուն զարգացման տնօրեն Արմեն Ստեփանյանի խոսքով՝ սա կնպաստի էներգիայի սպառման կրճատմանը և արտադրության արդյունավետությանը։

2025թ․ հունվար–սեպտեմբերին պետական բյուջեի եկամուտները կազմել են 2,012,814.3 մլն դրամ՝ ամբողջությամբ հարկերից և տուրքերից։ ԱԱՀ-ն աճել է 24.1%-ով, եկամտային հարկը՝ 10.1%-ով, շահութահարկը՝ 18.4%-ով, իսկ շրջանառության հարկը՝ 28.2%-ով։

Միջազգային

Թրամփի իշխանության վերադարձը բիթքոյնի գինը բարձրացրել է 40%-ով։ Նրա պաշտոնավարման առաջին տարում կրիպտոշուկայի ընդհանուր կապիտալիզացիան աճել է 1 տրիլիոն դոլարով՝ հասնելով ավելի քան 4 տրիլիոն դոլարի։

ԱՄՆ նախագահ Դոնալդ Թրամփը հայտարարել է սուրճի ներմուծման մաքսատուրքերի նվազեցման մասին՝ գների աճի ֆոնին։ 2024-ի օգոստոսից մինչև 2025-ի օգոստոս սուրճի մանրածախ գները աճել են 21%-ով։ ԱՄՆ-ն սուրճի 99%-ը ներմուծում է, հիմնականում Բրազիլիայից, Կոլումբիայից և Վիետնամից։

Իտալական բանկերն աջակցել են Եվրոպական կենտրոնական բանկի թվային եվրոյի ներդրմանը՝ ընդգծելով տեխնոլոգիական ճկունության կարևորությունը։ Նախագիծը միտված է եվրոպական վճարային համակարգի ինքնուրույնության ապահովմանը և «կայուն մետաղադրամների» աճող ժողովրդականությանը հակազդելուն։

Չինաստանի իշխանությունները մեղադրում են ԱՄՆ-ին՝ 13 միլիարդ դոլարի բիթքոյն գողանալու մեջ։ Ըստ չինական կողմի՝ գողությունը տեղի է ունեցել 2020թ․ դեկտեմբերին, և բիթքոյնները չորս տարի մնացել են անձեռնմխելի։