ՀՀ կառավարությունը հավանություն է տվել 2026 թվականին Վայոց ձորի մարզում արտադրված «Արենի» տեսակի խաղողի մթերումների գործընթացի կազմակերպման աջակցության միջոցառմանը։ Որոշմամբ նախատեսվում է մթերող տնտեսվարող սուբյեկտներին տրամադրել 70 դրամ սուբսիդավորում յուրաքանչյուր 1 կիլոգրամ խաղողի համար։
Ինչու է դա կարևոր. Միջոցառումը նպատակ ունի աջակցել Վայոց ձորի խաղողագործներին՝ ապահովելով «Արենի» տեսակի խաղողի ամբողջական իրացումը։ Աջակցության տրամադրման առնվազն 800 տոննայի շեմը սահմանվել է այն հաշվարկով, որ ծրագրից չօգտվեն գինու արտադրության նպատակով խաղող մթերողները (գինեգործության ոլորտում անհավասար մրցակցային պայմաններ չստեղծելու համար), և խաղողը մթերվի կոնյակի սպիրտի արտադրության նպատակով։
Աջակցության ծրագրի առանցքային պայմաններն ու սահմանափակումները.
Սուբսիդավորման չափն ու շեմը.
Տնտեսվարողը պետք է Վայոց ձորի մարզից մթերի առնվազն 800 տոննա «Արենի» տեսակի խաղող՝ 1 կգ-ի դիմաց վճարելով նվազագույնը 210 դրամ։
Նշված պայմանների բավարարման դեպքում մթերված ամբողջ ծավալի յուրաքանչյուր 1 կգ-ի համար պետությունը կտրամադրի 70 դրամ սուբսիդիա։
Հաշվառման սահմանափակումներ (շահերի բախման բացառում).
Առնվազն 800 տոննա քանակի մեջ չի հաշվառվում և սուբսիդավորման ենթակա չէ այն խաղողը, որը մթերվել է տնտեսվարողին սեփականության կամ օգտագործման իրավունքով պատկանող հողատարածքներից։
Սահմանափակումը տարածվում է նաև տնտեսվարողի հիմնադրի, ավելի քան 10% բաժնեմաս ունեցող բաժնետիրոջ կամ նրանց ընտանիքի անդամների (ծնող, ամուսին, զավակ) կողմից մշակվող հողատարածքներից գնվող խաղողի վրա։
Նպատակային ուղղվածությունը. Խթանել խոշոր մթերողների կողմից «Արենի» տեսակի խաղողի գնումը՝ կոնյակի սպիրտի արտադրության համար։
