ՆԱՏՕ-ի անդրադարձը՝ հայ-ադրբեջանական գործընթացին

Հաշվետվության համաձայն՝ 2025 թվականին արձանագրվել է առաջընթաց խաղաղության գործընթացում։

ՆԱՏՕ գլխավոր քարտուղար Մարկ Ռյութեի 2025 թվականի տարեկան հաշվետվությունում առանձին անդրադարձ է կատարվել Հարավային Կովկասի իրավիճակին և Հայաստանի ու Ադրբեջանի միջև հարաբերություններին։

Փաստաթղթում տարածաշրջանը ներկայացվում է որպես դաշինքի անվտանգության համար կարևոր ուղղություն՝ հաշվի առնելով Ռուսաստանի կողմից Ուկրաինայի դեմ պատերազմի շարունակական ազդեցությունը։ Այս համատեքստում ՆԱՏՕ-ն դրական է գնահատում հայ-ադրբեջանական երկխոսության զարգացումը։

Հաշվետվության համաձայն՝ 2025 թվականին արձանագրվել է առաջընթաց խաղաղության գործընթացում, և ընդգծվել է ԱՄՆ ներգրավվածությունը բանակցությունների առաջխաղացման գործում։

Առանձին շեշտադրում է արվել 2025 թվականի օգոստոսին խաղաղության համաձայնագրի նախաստորագրման վրա, որը դիտարկվում է որպես քայլ տարածաշրջանային կայունության ամրապնդման ուղղությամբ։

ՆԱՏՕ-ն նաև հայտնել է Հայաստանի և Ադրբեջանի հետ համագործակցությունը խորացնելու պատրաստակամության մասին։

Միաժամանակ, հաշվետվությունում անդրադարձ կա տարածաշրջանային գործընկերների հետ փոխգործակցությանը։ Հայաստանը նշվում է որպես ՆԱՏՕ-ի Building Integrity ծրագրի շրջանակում աջակցություն ստացող երկիր, որը ուղղված է պաշտպանության և անվտանգության ոլորտներում թափանցիկության և կառավարման արդյունավետության բարձրացմանը։

Փաստաթուղթը հայ-ադրբեջանական գործընթացը ներկայացնում է որպես Հարավային Կովկասում կայունության ձևավորման առանցքային գործոն՝ լայն տարածաշրջանային անվտանգության համատեքստում։