Մետրոպոլիտենի աշխատանքի խափանման պատճառով մետրոյի կայարաններում մեծ կուտակումներ են

Մետրոպոլիտենը պարզաբանել է, որ խափանումը պայմանավորված է եղել հոսանքի տատանումներով:

Երևանի մետրոպոլիտենի աշխատանքի խափանման պատճառով կայարաններում առաջացել են մեծ կուտակումներ։

Խափանումը զգալիորեն ազդել է քաղաքի տրանսպորտային հոսքերի վրա, ինչի հետևանքով բազմաթիվ քաղաքացիներ ստիպված են եղել օգտվել տաքսիներից, իսկ գները կտրուկ բարձրացել են։

Ուևորներից մեկը պատմել է, որ առավոտյան «Գարեգին Նժդեհ» կայարանից շարժվելուց կարճ ժամանակ անց ուղևորներին իջեցրել են վագոններից՝ առանց հստակ պատճառի նշման։

Նրա խոսքով՝ ուղևորներին տեղափոխել են այլ վագոնով մինչև «Սասունցի Դավիթ» կայարան, որտեղից մարդիկ շարունակել են ճանապարհը ավտոբուսներով։

Մետրոպոլիտենը պարզաբանել է, որ խափանումը պայմանավորված է եղել հոսանքի տատանումներով, ինչի հետևանքով բաց հատվածում առաջացել է տեխնիկական խնդիր։

Նշվում է, որ այս պահին մասնագետները տեղում իրականացնում են վերականգնման աշխատանքներ։

Ժամանակավորապես մետրոն անցել է մեկ գծանի երկկողմանի երթևեկության։

Քաղաքացիներից խնդրում են ըմբռնում՝ մինչև խնդրի ամբողջական լուծումը։