The Information պարբերականի ձեռքի տակ հայտնված ընկերության ներքին հուշագրում նշվում է, որ Meta-ն ծրագրում է հաջորդ տարվա ընթացքում սկսել իր նոր AI կախազարդի փորձարկումները։ Սարքը նախատեսված է պարանոցին կրելու համար և գործելու է որպես մշտապես հասանելի օգնական։ Դրա գործառույթների թվում են ձայնագրումը, խոսքի ամփոփումը և անցյալում տեղի ունեցած զրույցների բովանդակային որոնումը։
2025 թվականին Meta-ն ձեռք բերեց Limitless ստարտափը, որը ստեղծել էր Pendant անունով AI սարքը։ Limitless-ի արտադրանքն իրենից ներկայացնում էր հագուստին ամրացվող սեղմակ-խոսափող (միկրոֆոն), որը ձայնագրում էր այն ամենը, ինչ օգտատերն ասում կամ լսում էր կրելու ընթացքում՝ այդ ամենը վերածելով տեքստի և որոնելի հիշողության բազայի։ Ամենայն հավանականությամբ, Meta-ն օգտագործում է հենց այս տեխնոլոգիան որպես հիմք՝ սեփական կախազարդը մշակելու համար։
Ինչո՞ւ է Meta-ն հետաքրքրված AI կախազարդերով
Meta-ի սարքավորումների և մետատիրույթի (metaverse) մշակմամբ զբաղվող ստորաբաժանումը՝ Reality Labs-ը, 2020 թվականից ի վեր ավելի քան 80 միլիարդ դոլարի ընդհանուր գործառնական կորուստ է կրել։ Այդ իսկ պատճառով ընկերության ղեկավարությունը փնտրում է նոր, հիթային արտադրանքներ։
Գաղտնազերծված հուշագիրը բացահայտում է ընկերության սարքավորումների զարգացման ավելի լայն ճանապարհային քարտեզը, որը ներառում է նաև նոր խելացի ակնոցներ և «աշխատանքային կրելի սարքեր»։ AI կախազարդը կատարելապես համապատասխանում է այս ռազմավարությանը՝ որպես պարզ սարք, որն ապահովում է իրական աշխարհից տվյալների ստացումը Meta-ի AI մոդելների կատարելագործման համար։
Այս կախազարդը դասվում է «ֆոնային» (ambient) տեխնոլոգիաների շարքին, ինչը նշանակում է, որ օգտատերը պարտադիր չէ ակտիվորեն կառավարի այն։ Փոխարենը սարքը հանգիստ լսում է ֆոնային ռեժիմում և անհրաժեշտության դեպքում գեներացնում է օգտակար հիշեցումներ ու ամփոփումներ։
AI զարդերի ստեղծման այլ փորձեր
Meta-ն միակը չէ, որ ուսումնասիրում է AI կախազարդերի և զարդերի շուկան։
Անցյալ տարի Samsung-ի ղեկավարները հայտարարեցին, որ ընկերությունը հետաքրքրված է AI կրելի սարքերով, որոնք նման են առօրյա աքսեսուարների, այդ թվում՝ ակնոցների, ականջօղերի, մատանիների, ժամացույցների և վզնոցների։ Samsung-ի բջջային ստորաբաժանման գործառնական տնօրեն (COO) Վոն-ջուն Չոյը դրանք նկարագրեց որպես սարքեր, որոնք դուք պարզապես «կրում եք» (որպես հագուստ/զարդ) և ոչ թե «վերցնում ձեզ հետ» (ինչպես հեռախոսը)՝ հաստատելով, որ ընկերությունն «ուսումնասիրում է բոլոր հնարավոր տարբերակները»։
Այս տարվա սկզբին՝ CES 2026 ցուցահանդեսի ժամանակ, Samsung-ը ներկայացրեց իր «AI OLED կախազարդի» հայեցակարգը (concept)։ Այն կախվում է պարանոցից և ունի փոքրիկ OLED էկրան։ Samsung-ի փոխանցմամբ՝ ձայնային հրամանների և ձեռքերն ազատ արձակելու (hands-free) հնարավորության շնորհիվ այս AI սարքը «կարող է անել ավելին, քան սմարթֆոնները»։
Թե՛ Samsung-ը, թե՛ Meta-ն գրազ են գալիս այն գաղափարի վրա, որ AI-ն հեռախոսներից կտեղափոխվի այնպիսի իրերի մեջ, որոնք մարդիկ ամբողջ օրը կրում են իրենց մարմնի վրա։
AI կախազարդերի համաշխարհային միտումը
Limitless ընկերությունն իր Pendant սարքով օգնեց հիմք դնել AI կախազարդերի շուկայի ձևավորմանը։ 2024 թվականին ընկերությունն ընդամենը 24 ժամում վաճառեց 10,000 AI կախազարդ։
Այն բանից հետո, երբ Meta-ն գնեց Limitless-ը և դադարեցրեց բնօրինակ Pendant-ի վաճառքը, շատերն ակնկալում էին, որ ընկերությունն այդ հայեցակարգը կինտեգրի սեփական սարքավորումների մեջ։
Այժմ Meta-ի նոր ծրագրերը հաստատում են, որ տեխնոլոգիական հսկան հսկայական ներուժ է տեսնում AI կախազարդերի և զարդերի տեսքով կրելի սարքերի մեջ։
Այլ ստարտափներ նույնպես ակտիվորեն հետազոտում են AI կրելի սարքերի (wearables) ոլորտը։ Օրինակ՝ Հարվարդի նախկին ուսանող Ավի Շիֆմանն աշխատում է Friend կոչվող AI կախազարդի վրա, որն իրենից ներկայացնում է նրբաոճ աքսեսուար և անվերջ լսում է շրջակա զրույցները։
