Meta-ն ներգրավել է մոտ 29 միլիարդ դոլար AI տվյալների կենտրոնների համար

Գումարը կուղղվի Լուիզիանայում տվյալների կենտրոնի ստեղծմանը:

Meta-ն մոտ 29 միլիարդ դոլար է ապահովել արհեստական բանականության տվյալների կենտրոնների կառուցման համար, գրում է Reuters-ը։ Գումարը կուղղվի Լուիզիանայում տվյալների կենտրոնի ստեղծմանը, որի համար ընկերությունը համագործակցում է Pimco-ի և Blue Owl Capital-ի հետ։

Pimco-ն տրամադրել է 26 միլիարդ դոլար վարկ, իսկ Blue Owl Capital-ը՝ 3 միլիարդ դոլար բաժնետիրական ներդրում։ Bloomberg-ի տվյալներով՝ գործարքի կազմակերպմանը մասնակցել է Morgan Stanley-ն, իսկ հետագայում կարող են միանալ նաև Apollo Global Management-ը և KKR-ը։

Այս գործընկերությունը Meta-ին հնարավորություն կտա կիսել AI ենթակառուցվածքների ներդրումային ռիսկերն ու ծախսերը։ 2025-ի հուլիսին Մարկ Ցուկերբերգը հայտնել էր, որ ընկերությունը հարյուր միլիարդավոր դոլարներ կուղղի Superintelligence Labs-ի նոր տվյալների կենտրոններին։