Մարտի 19-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

ԵԱՏՄ-ում կկարգավորվի էլեկտրոնային առևտուրը

ՀՀ-ն պատրաստվում է ստորագրել համաձայնագիր, որով կկարգավորվի ԵԱՏՄ շրջանակում էլեկտրոնային առևտրի գործունեությունը։ Այն նպատակ ունի ապահովել փոխադարձ առևտրի կանոնները, ինչպես նաև պաշտպանել մասնակիցների իրավունքներն ու շահերը։

Բիզնեսից ակնկալվում է հարկային պարտաճանաչություն

Վարչապետ Նիկոլ Փաշինյանը հայտարարել է, որ Հարկային օրենսգրքում առաջարկվող փոփոխությունները միտված են պետություն-բիզնես փոխվստահության ամրապնդմանը։ Նրա խոսքով՝ կառավարությունը ակնկալում է, որ բիզնեսը կվճարի իր հարկերը՝ առանց ավել կամ պակաս, և «հարկային տեռորը» փակված է։

ՀՀ-ին վերադարձվել է շուրջ 773 մլն դոլարի գույք

2018-2025 թվականներին պետությանը վերադարձվել է շուրջ 291.7 մլրդ դրամ կամ մոտ 773 մլն դոլարի գույք և միջոցներ։ Դրանց զգալի մասը՝ 65.8%-ը, վերադարձվել է վերջին երեք տարիներին։

Ոսկյա իրերի գործարքների համար ԱԱՀ-ի նոր կանոններ են առաջարկվում

Ֆինանսների նախարարությունը առաջարկում է ոսկուց և թանկարժեք քարերից պատրաստված իրերի համար սահմանել ԱԱՀ-ի հաշվարկման նոր մեխանիզմներ՝ տարբեր մոտեցումներով արտադրողների և վերավաճառողների համար։

ՊԵԿ-ը կփոխի մոտեցումը հարկային խախտումների դեպքում

Այսուհետ հարկեր չվճարելու դեպքում ՊԵԿ-ը նախ կապ կհաստատի տնտեսվարողի հետ՝ առանց անմիջապես հաղորդում ներկայացնելու։ Նպատակն է բարձրացնել կամավոր հարկային կարգապահությունը և ամրապնդել փոխվստահությունը։

ՄԻՋԱԶԳԱՅԻՆ ԼՈՒՐԵՐ

Եվրոպայում գազի գները կտրուկ աճել են

Կատարի գազային օբյեկտի վրա հարվածից հետո Եվրոպայում գազի գները աճել են շուրջ 30%-ով՝ հասնելով 70.7 եվրոյի մեկ ՄՎտժ-ի դիմաց։ Brent նավթի գինը նույնպես աճել է՝ հասնելով 113 դոլարի։

ԱՄՆ-ի պետական պարտքը գերազանցել է 39 տրիլիոն դոլարը

ԱՄՆ պետական պարտքը առաջին անգամ անցել է 39 տրիլիոն դոլարի սահմանը։ Կանխատեսվում է, որ մինչև 2036 թվականը այն կարող է հասնել ավելի քան 56 տրիլիոն դոլարի։

Պենտագոնը պահանջում է ավելի քան 200 մլրդ դոլար

The Washington Post-ի տվյալներով՝ Պենտագոնը Իրանի դեմ պատերազմի համար պահանջել է ավելի քան 200 մլրդ դոլար ֆինանսավորում։

Գերմանիայում սահմանափակվել է վառելիքի գների բարձրացումը

Գերմանիայի կառավարությունը որոշել է սահմանափակել վառելիքի գների բարձրացման հաճախականությունը՝ թույլատրելով օրական միայն մեկ թանկացում՝ տարածաշրջանային լարվածության ֆոնին։