Պարտադիր ապահովագրություն Վրաստան մուտքի համար․ բացառությունները

Նոր պահանջը սահմանում է մուտքի վերահսկման միասնական կարգ՝ զբոսաշրջային հոսքերի համար։

Պետական եկամուտների կոմիտեն հայտնում է, որ Վրաստանի արտաքին գործերի նախարարությունից ստացված տեղեկատվության համաձայն՝ 2026 թվականի հունվարի 1-ից Վրաստան մուտք գործող յուրաքանչյուր զբոսաշրջիկ սահմանային անցակետում պարտավոր է ներկայացնել առողջության և դժբախտ պատահարի ապահովագրությունը հավաստող փաստաթուղթ։

Փաստաթուղթը կարող է ներկայացվել ֆիզիկական կամ էլեկտրոնային տարբերակով և պետք է լինի վրացերեն կամ անգլերեն լեզվով։ Այն կարող է տրամադրվել ինչպես վրացական, այնպես էլ արտասահմանյան ապահովագրական ընկերությունների կողմից՝ նվազագույնը 30 000 լարի ապահովագրական գումարի սահմանաչափով։

Ապահովագրական փաստաթուղթը պետք է պարունակի հետևյալ տեղեկությունները՝

• ապահովագրական պայմանագրի կողմերը,

• ծածկույթի տարածքը,

• ապահովագրության առարկան,

• ապահովագրության սկզբի և ավարտի ամսաթվերը,

• ապահովագրված ռիսկերը,

• ապահովագրական գումարի սահմանաչափը,

• ապահովագրական վճարի չափը, վճարման վայրը և ժամկետը։

Ապահովագրությունը պետք է ուժի մեջ լինի զբոսաշրջիկի Վրաստանում գտնվելու ամբողջ ժամանակահատվածում։

Պարտադիր ապահովագրության պահանջից ազատված են՝

• Վրաստան մուտքի դիվանագիտական կամ հատուկ արտոնագիր ունեցող անձինք,

• դիվանագիտական, պաշտոնական, ծառայողական կամ հատուկ անձնագիր կրողները,

• դիվանագիտական առաքելությունների, հյուպատոսական հիմնարկների, միջազգային կազմակերպությունների ներկայացուցչությունների հավատարմագրված աշխատակիցները և նրանց ընտանիքի անդամները,

• այն անձինք, որոնց մուտքը Վրաստան նախատեսված է միջազգային համաձայնագրերով կամ պայմանագրերով,

• միջազգային ավտոմոբիլային բեռնափոխադրումներով և ուղևորափոխադրումներով զբաղվող վարորդները։

Նոր պահանջը սահմանում է մուտքի վերահսկման միասնական կարգ՝ զբոսաշրջային հոսքերի համար։