Լեոնարդո Դի Կապրիոն խոսել է կինոթատրոնների դերի փոփոխության մասին՝ հոսքային բովանդակության պայմաններում

Կինոթատրոնները կարող են աստիճանաբար դառնալ նիշային տարածքներ։

Օսկարակիր դերասան Լեոնարդո Դի Կապրիոն անդրադարձել է կինոյի ապագային հոսքային հարթակների և կարճ ձևաչափի թվային բովանդակության տարածման պայմաններում։ Այդ մասին նա խոսել է The Times of London-ին տված հարցազրույցում։

Դի Կապրիոյի խոսքով՝ ներկայում տեղի ունեցող փոփոխությունները վերաբերում են ոչ միայն բովանդակության տարածման ձևերին, այլև արվեստի սպառման ընդհանուր մոդելին։ Նա նշել է, որ վերջին տարիներին կինոթատրոններում վավերագրական և դրամատիկական ֆիլմերի ցուցադրությունները կրճատվել են, իսկ հանդիսատեսը հաճախ նախընտրում է սպասել դրանց հայտնվելուն հոսքային հարթակներում։

Դերասանը նաև անդրադարձել է կինոդիտման մշակույթի հնարավոր փոփոխությանը՝ նշելով, որ կինոթատրոնները կարող են աստիճանաբար դառնալ նիշային տարածքներ՝ նախատեսված սահմանափակ լսարանի համար։ Նրա գնահատմամբ՝ այդ դեպքում զանգվածային կինոդիտումը կարող է զիջել տեղը ավելի մասնագիտացված հանդիսատեսին։

Դի Կապրիոն միաժամանակ ընդգծել է մեծ էկրանի համար ֆիլմեր ստեղծելու կարևորությունը և նշել, որ ապագա կինոգործիչների համար անհրաժեշտ է պահպանել այդ հնարավորությունը։

Հարցազրույցում նա անդրադարձել է նաև արհեստական բանականության կիրառմանը կինոարտադրությունում՝ նշելով, որ այն կարող է ծառայել որպես գործիք երիտասարդ ռեժիսորների համար, սակայն արվեստի արժեքը, նրա խոսքով, պայմանավորված է մարդկային տեսանկյունից ձևավորված բովանդակությամբ։

Դերասանի խոսքով՝ առանց միջին բյուջեի դրամատիկական ֆիլմերի շարունակական արտադրության կինոն կարող է կորցնել իր դերը որպես լայն լսարանի համար նախատեսված մշակութային հարթակ։