ՀՀ արդարադատության նախարար Սրբուհի Գալյանն ընդունել է Հայաստանի Հանրապետությունում Եվրոպական միության պատվիրակության ղեկավար, դեսպան Վասիլիս Մարագոսին։ Այս մասին հայտնում է ՀՀ արդարադատության նախարարության տեղեկատվության և հասարակայնության հետ կապերի վարչությունը։
ՀՀ-ԵՄ օրակարգ և վիզաների ազատականացում Հանդիպման ընթացքում կողմերն անդրադարձել են երկկողմ հարաբերությունների ռազմավարական ուղղություններին, մասնավորապես՝ ՀՀ-ԵՄ վիզաների ազատականացման գործողությունների ծրագրի (VLAP) իրականացման ընթացիկ արդյունքներին ու արձանագրված առաջընթացին։ Քննարկման առանցքում են գտնվել նաև Հայաստանում ընթացող դատաիրավական և Սահմանադրական բարեփոխումների օրակարգային հարցերը։
Քրեակատարողական ոլորտի բարեփոխումներ Նախարար Սրբուհի Գալյանը եվրոպացի գործընկերոջն է ներկայացրել արդարադատության նախարարության համակարգում իրականացվող ոլորտային փոփոխությունները։ Մասնավորապես, քննարկվել են պատժից պայմանական վաղակետ ազատման մեխանիզմների կատարելագործման ընթացքը, ինչպես նաև քրեակատարողական հիմնարկներում (ՔԿՀ) դատապարտված և կալանավորված անձանց թվային հարաբերակցությանը վերաբերող խնդիրները՝ ուղղված կալանքը որպես խափանման միջոց կիրառելու պրակտիկայի օպտիմալացմանը։
Առաջիկա միջոցառումներ Հանդիպման շրջանակներում կողմերը համադրել են առաջիկայում Երևանում անցկացվելիք երկկողմ բարձր մակարդակի միջոցառումների նախապատրաստական աշխատանքները, այդ թվում՝
ՀՀ-ԵՄ Մարդու իրավունքների երկխոսության հերթական նիստը,
Արդարադատություն, ազատություն և անվտանգություն ենթակոմիտեի հանդիպումները։
Հանդիպման ավարտին երկուստեք մտքեր են փոխանակվել փոխադարձ հետաքրքրություն ներկայացնող այլ հարցերի շուրջ և վերահաստատվել է պատրաստակամությունը՝ խորացնելու համագործակցությունը համակարգային բարեփոխումների օրակարգի շուրջ։
