Կալանավորվել է Մեղրիի մաքսակետի ղեկավարը

Քրեական հետապնդում է հարուցվել ընդհանուր առմամբ հինգ անձի նկատմամբ։

Պետական եկամուտների կոմիտեի Մեղրիի մաքսակետի ղեկավարը կալանավորվել է քրեական վարույթի շրջանակում։

Հակակոռուպցիոն կոմիտեի պաշտոնական տեղեկատվության համաձայն՝ քննվող վարույթի շրջանակում քրեական հետապնդում է հարուցվել ընդհանուր առմամբ հինգ անձի նկատմամբ, այդ թվում՝ ՊԵԿ մի շարք պաշտոնյաների։

Նրանք մեղադրվում են իշխանական լիազորությունները չարաշահելու, հարկերից խուսափելու և այդ գործողություններին օժանդակելու մեջ։ Կոմիտեի տվյալներով՝ ՊԵԿ պաշտոնյաներից մեկի, ինչպես նաև ևս մեկ անձի նկատմամբ որպես խափանման միջոց կիրառվել է կալանքը։

Կալանավորված պաշտոնյաներից մեկը հանդիսանում է ՊԵԿ Մեղրիի մաքսակետի ղեկավարը։ Քրեական վարույթի նախաքննությունը շարունակվում է։