Հայաստանում 10 ամսում իրականացվել է ավելի քան 551 մլրդ դրամի շինարարություն

Բնակչության միջոցներով 10 ամսում իրականացվել է 120 մլրդ 117.2 մլն դրամի շինարարություն:

Հայաստանում 10 ամսում՝ հունվար-հոկտեմբերին իրականացվել է 551 մլրդ 434.5 մլն դրամի շինարարություն, որը նախորդ տարվա նույն ժամանակահատվածի նկատմամբ աճել է 20.6 տոկոսով։ Այս մասին են վկայում Վիճակագրական կոմիտեի հրապարակած ցուցանիշները։

Ընդ որում 26.3 տոկոսն իրականացվել է պետական բյուջեի միջոցներով` կազմելով 145 մլրդ 202.2 մլն դրամ, որը 2024-ի նույն ժամանակահատվածի նկատմամբ ավելի է 38.2 տոկոսով։

Համայնքների միջոցներով իրականացվել է 27 մլրդ 913.2 մլն դրամի շինարարություն, աճը 28.4 տոկոս է։ Համայնքների միջոցներով իրականացված շինարարությունը կազմում է 10 ամսում իրականացված ընդհանուր շինարարության 5.1 տոկոսը։

Կազմակերպությունների միջոցներով իրականացվել է ընդհանուր շինարարության 46.5 տոկոսը՝ կազմելով 256 մլրդ 321.6 մլն դրամ, ինչը նախորդ տարվա 10 ամսվա համեմատ աճել է 15.5 տոկոսով։ Դրանից օտարերկրյա ներդրողների միջոցներով իրականացված շինարարության ծավալը նվազել է 2.4 տոկոսով՝ կազմելով 1 մլրդ 272 մլն դրամի։

Բնակչության միջոցներով 10 ամսում իրականացվել է 120 մլրդ 117.2 մլն դրամի շինարարություն, որը նախորդ տարվա նույն ժամանակահատվածի նկատմամբ աճել է 14.9 տոկոսով։ Սա կազմում է ընդհանուր շինարարության 21.8 տոկոսը։