Հայաստանի 660 հազար կենսաթոշակառուներից վճարումները կանխիկ է ստանում 48 հազարը

Գործընթացի շրջանակում աշխատանքներ են տարվում նաև ՀՀ Կենտրոնական բանկի հետ։

Հայաստանում բնակվող շուրջ 660 հազար կենսաթոշակառուներից և նպաստ ստացող քաղաքացիներից միայն մոտ 48 հազարը մինչ օրս ստանում է վճարումները կանխիկ եղանակով։ Այս մասին մամուլի ասուլիսի ընթացքում հայտնել է ՀՀ աշխատանքի և սոցիալական հարցերի նախարար Արսեն Թորոսյանը։

Նախարարի խոսքով՝ կառավարության նպատակն է սոցիալական վճարների ամբողջական անցումը անկանխիկ համակարգի։ Ըստ ներկայացված պարզաբանման՝ անկանխիկ վճարումները նվազեցնում են անվտանգության ռիսկերը, ապահովում են ֆինանսական հոսքերի ավելի հստակ վերահսկելիություն և պարզեցնում են վճարումների կազմակերպումը։

Նշվել է, որ գործընթացի շրջանակում աշխատանքներ են տարվում նաև ՀՀ Կենտրոնական բանկի հետ՝ այն քաղաքացիների համար, ովքեր բանկային ծառայություններից օգտվելու ֆիզիկական կամ կազմակերպչական դժվարություններ ունեն։ Քննարկվում են լուծումներ, որոնք թույլ կտան նվազեցնել բանկ այցելելու անհրաժեշտությունը և ապահովել սոցիալական վճարների հասանելիությունը բոլոր շահառուների համար։

Կարգավորումը նպատակ ունի սոցիալական վճարումների համակարգի թվայնացման ընդլայնմանը և ֆինանսական ներառականության բարձրացմանը։