Տեղական լուրեր
ԼՂ-ից տեղահանվածների աջակցության գումարի չափը 2027-ից կնվազեցվի
2027 թվականի ապրիլից ԼՂ-ից տեղահանված առանձին խմբերի համար սոցիալական աջակցությունը կսահմանվի ամսական 15,000 դրամ (նպատակ ունենալով խթանել սոցիալ-տնտեսական ինքնուրույնությունը): 2026 թ. սեպտեմբերին աջակցություն է ստացել 45,800 անձ (ընդհանուր՝ շուրջ 1.4 մլրդ դրամ):
Ավելի քան 910 հազար դոլար՝ ՄԻԱՎ-ի բուժման և կանխարգելման համար
ՀՀ կառավարությունը 327.3 մլն դրամ (ավելի քան 910 հազար դոլար) է հատկացրել հակառետրովիրուսային, հակատուբերկուլոզային դեղամիջոցների և ՄԻԱՎ/ՁԻԱՀ-ի լաբորատոր ախտորոշման թեստերի ձեռքբերման ու անխափան մատակարարման համար:
Վառելիքի ներկրման պարզեցված ընթացակարգ սահմանին
Նոր որոշմամբ վառելիք տեղափոխող մեքենաներին թույլատրվել է հատել սահմանը՝ առանց օրերով սպասելու. ԵԱՏՄ համապատասխանության փաստաթուղթը կարող է ներկայացվել 10 օրվա ընթացքում, իսկ վառելիքը մինչ այդ կարող է բեռնաթափվել և պահեստավորվել ներկրողի տարածքում (առանց վաճառքի իրավունքի):
Մինչև 200 հազար դրամ աշխատավարձ ստացողները կընդգրկվեն առողջության ապահովագրության համակարգում
2027 թ. հունվարի 1-ից մինչև 200,000 դրամ եկամուտ ունեցող քաղաքացիների 10,800 դրամանոց ապահովագրավճարը կբաշխվի հետևյալ կերպ՝ 4,400 դրամ պետությունը, 4,400 դրամ գործատուն, 2,000 դրամ աշխատողը: 200,000-500,000 դրամ ստացողների համար պետությունը կսուբսիդավորի 6,000 դրամ:
Հայաստանից ԱՄԷ է արտահանվել շուրջ 160 հազար ծաղիկ
Էկոնոմիկայի նախարար Գևորգ Պապոյանը հայտնել է, որ Հայաստանից ԱՄԷ արտահանված ծաղիկների ծավալը հասել է մոտ 160 հազարի, և նախատեսվում է ավելացնել այդ ցուցանիշը:
Միջազգային լուրեր
Եվրահանձնաժողովը բացառել է ռուսական գազի վերադարձը
ԵՄ-ն չի վերսկսի ռուսական գազի գնումները նույնիսկ խաղաղության համաձայնագրից հետո: Հաստատված ժամանակացույցի համաձայն՝ հեղուկացված բնական գազի (ՀԲԳ) մատակարարման արգելքն ուժի մեջ կմտնի 2027 թ. սկզբին, իսկ խողովակաշարայինինը՝ 2027 թ. աշնանը:
Համաշխարհային բանկ. Պարենամթերքը 2027-ին կթանկանա ևս 7%-ով
Համաշխարհային բանկը կանխատեսում է պարենամթերքի համաշխարհային գների 7% աճ 2027 թվականին (2026-ի 10% աճից հետո)՝ լոգիստիկայի խափանումների, եղանակային պայմանների և պարարտանյութերի թանկացման պատճառով:
Microsoft-ի ռեկորդային եռամսյակային հասույթը՝ 92.3 մլրդ դոլար
Microsoft-ը 10-րդ եռամսյակն անընդմեջ թարմացնում է հասույթի ռեկորդը (19% աճ)՝ ապահովելով 36.6 մլրդ դոլարի զուտ շահույթ: Աճի հիմնական շարժիչը Microsoft Cloud-ն է (63.9 մլրդ դոլար):
Mercedes-Benz-ը նվազեցրել է 2026 թ. շահութաբերության կանխատեսումը
Չինաստանի շուկայում առկա խնդիրների պատճառով Mercedes-Benz-ը մարդատար ավտոմեքենաների ստորաբաժանման ճշգրտված շահութաբերության մարժայի կանխատեսումը 3-5%-ից իջեցրել է 2-3%-ի:
