Հայտնաբերվել է 2000 չգրանցված աշխատող, թաքցվել է 108 մլրդ դրամի հարկ

Ցուցանիշը 27 տոկոսով ավելի է նախորդ տարվա նույն ժամանակահատվածում արձանագրված թվից։

Պետական եկամուտների կոմիտեն 2025 թվականի հունվար-սեպտեմբեր ամիսներին իրականացված միջոցառումների արդյունքում հայտնաբերել է 2000 չգրանցված աշխատողի, այդ ցուցանիշը 27 տոկոսով ավելի է նախորդ տարվա նույն ժամանակահատվածում արձանագրված թվից: Այս մասին, այսօր՝ հոկտեմբերի 24–ին, մամուլի ասուլիսի ժամանակ նշեց ՊԵԿ նախագահ Էդուարդ Հակոբյանը։

«Հայտնաբերվել է շուրջ 325 մլրդ դրամի ստվերային շրջանառություն, որն անցած տարվա ցուցանիշից ավելի է 97 տոկոսով։ Եթե դա հարկերի վերածենք, թաքցված հարկի ընդհանուր գումարը կազմել է 108 մլրդ դրամ, ինչը անցած տարվա նույն ժամանակահատվածի համեմատ ավելի է շուրջ 52 տոկոսով»,- ասաց Հակոբյանը:

ՊԵԿ նախագահը նշեց՝ ստուգման և ուսումնասիրության գործիքներով ճշտվել է մոտ 104 մլրդ դրամ լրացուցիչ հարկային պարտավորություն:

«9 ամիսներին վերլուծական գործիքակազմով հայտնաբերված անճշտությունների արդյունքում հարկ վճարողների կողմից լրացուցիչ հայտարարագրվել է 57 մլրդ դրամ գումար, որը 9 տոկոսով ավելի է նախորդ տարվա ցուցանիշից: Հաշվարկային փաստաթղթերով ուղեկցված գործարքների իրացման շրջանառությունն աճել է 15 տոկոսով, իսկ դրանց դուրսգրման քանակը՝ 17 տոկոսով»,- նշեց ՊԵԿ նախագահը:

Էդուարդ Հակոբյանը նշեց նաև մանրածախ առևտրի և ծառայությունների շրջանակում անկանխիկ վճարումների վերաբերյալ թվերը. վճարումների քանակն աճել է 55 տոկոսով, իսկ գումարը՝ 32 տոկոսով: