«Ֆուտբոլը խաղաղության մասին է, այլ ոչ` քաղաքականության». ՖԻՖԱ-ի նախագահ

ՖԻՖԱ-ի նախագահ Ջաննի Ինֆանտինոն մեղադրել է 2026 թվականի Աշխարհի առաջնության քննադատներին՝ մրցաշարի վերաբերյալ ատելություն և կեղծ տեղեկություններ տարածելու մեջ։ Տարածված բաց նամակում նա հայտարարել է, որ առաջնությունն անցկացվել է միասնության, անվտանգության ու ներառականության պայմաններում և պսակվել է լիակատար հաջողությամբ։

ՖԻՖԱ-ի ղեկավարի գնահատմամբ՝ քննադատները կանխակալ մոտեցման պատճառով անտեսել են միլիոնավոր երկրպագուների դրական էմոցիաները։

«Դուք այնքան կենտրոնացած էիք ատելության և քննադատության վրա, որ բաց թողեցիք այդ ամենը»,- գրել է Ինֆանտինոն։

Նա ընդգծել է, որ կազմակերպությունն իր ուշադրությունը կենտրոնացրել էր մրցաշարի կազմակերպման և անվտանգության ապահովման վրա, ինչի շնորհիվ առաջնության ընթացքում բռնության դեպքեր կամ լուրջ միջադեպեր չեն արձանագրվել։

Հիշեցնենք, որ Աշխարհի առաջնության ընթացքում ՖԻՖԱ-ն քննադատության թիրախում էր հայտնվել ԱՄՆ մուտքի սահմանափակումների, հակամարտությունների մեջ գտնվող երկրների հավաքականների մասնակցության և այլ վիճահարույց հարցերի պատճառով։ Ինֆանտինոն անդրադարձել է նաև մրցավարական որոշումներին՝ նշելով, որ սխալ քարտերը կամ որոշ խաղացողների չորակազրկելը ֆուտբոլային բնականոն գործընթացի մաս են։

Նա հատուկ ընդգծել է, որ Իրանի հավաքականը ստացել է ԱՄՆ մուտքի արտոնագրեր՝ չնայած երկու երկրների միջև առկա խոր լարվածությանը։ «Ֆուտբոլը խաղաղության մասին է, այն քաղաքականության մասին չէ»,- եզրափակել է ՖԻՖԱ-ի նախագահը։

Ստորև ներկայացված է ԱԱ-2026-ի շուրջ քննադատության և ՖԻՖԱ-ի պաշտոնական դիրքորոշման համադրությունը.