Telegram-ով տարածվող iPhone-ների արգելափակման խաբեությունները նոր փուլ են մտել․Արթուր Պապյան

Վերջին ամիսներին աճել են դեպքերը, երբ խաբեբաները Telegram հարթակում թիրախավորում են iPhone օգտատերերին՝ նրանց սարքերն արգելափակելու, տվյալները գողանալու կամ նույնիսկ փրկագին պահանջելու նպատակով։ Մեդիափորձագետ Արթուր Պապյանի խոսքով՝ սա արդեն լայնածավալ արշավ է, որը կիրառվում է տարբեր մեթոդներով՝ սկսած սիրային ծուղակներից մինչև խաղերի անվճար խոստումներ երեխաներին։

Խաբեության տարբեր սցենարներ

1. Սիրային ծուղակ՝ վստահություն ստեղծելու ճանապարհով

Խարդախները ներկայանում են որպես հնարավոր ծանոթություն և սկսում շփվել Telegram-ով։ Երբ վստահության մթնոլորտ է ձևավորվում, նրանք հորինում են պատմություն՝ իբր կորցրել են իրենց հեռախոսը և շտապ անհրաժեշտություն ունեն մուտք գործել iCloud։ Օգտատիրոջից խնդրում են iPhone-ում մուտք գործել իրենց Apple ID-ով։ Դրանից հետո փոխում են գաղտնաբառը, ակտիվացնում «Find My iPhone»-ը և արգելափակում սարքը։ Հետևում է փրկագնի պահանջ՝ $100֊$600 չափով։

2. Կեղծ աշխատանքի առաջարկ՝ հավելվածների “թեստավորման” անվան տակ

Խաբեբաները ներկայանում են որպես աշխատանքի առաջարկող ընկերություն, ներկայացնում հեռակա աշխատանք որպես հավելվածների թեստավորող, խոստանում բարձր վարձատրություն։ Հիմնական խաբեությունը սկսվում է, երբ խնդրում են օգտատիրոջը դուրս գալ իր iCloud-ից և մուտք գործել իրենց տրամադրած տվյալներով՝ իբր ծրագրերն աշխատելու համար։ Արդյունքում՝ սարքը կրկին արգելափակվում է և սկսվում է փրկագնի պահանջը։

3. Խաղերի անվճար խոստումներ երեխաներին

Տագնապալի տարբերակներից մեկն էլ վերաբերում է երեխաներին։ Խաբեբաները խոստանում են անվճար խաղեր, Roblox-ի մոդեր կամ այլ բովանդակություն՝ խնդրելով մուտք գործել iCloud տվյալներով։ Երեխաները, չգիտակցելով վտանգը, կատարում են այդ քայլը, ինչի արդյունքում խարդախները վերահսկում են սարքը, լուսանկարներն ու տվյալները։

Ինչպես պաշտպանվել

• Երբեք մի մուտքագրեք այլ մարդկանց Apple ID-ն ձեր սարքում։
  
• Խոսեք երեխաների հետ առցանց անվտանգության մասին, բացատրեք, թե ինչու չպետք է կիսել հաշվի տվյալները կամ հետևել անվճար բովանդակության խոստումներին։
  
• Անտեսեք կասկածելի առաջարկները, նույնիսկ եթե դրանք թվում են հաճելի կամ շահավետ։

Եթե արդեն խաբվել եք

• Դիմեք Apple Support-ին։ Սա միակ օրինական տարբերակն է սարքի ապաարգելափակման համար։
• Պատրաստ եղեք ներկայացնել գնումի փաստաթղթեր, քանի որ գործընթացը երկարատև է և ենթադրում է սարքի իրական տիրոջ նույնականացում։
  
• Չփոխանցեք գումար խաբեբաներին։ Ոչ մի երաշխիք չկա, որ նրանք հետո կբացեն ձեր սարքը։

Արթուր Պապյանը շեշտում է, որ խաբեբաներին գումար փոխանցելը միայն խրախուսում է նրանց։ Միակ անվտանգ ճանապարհը պաշտոնական աղբյուրներին դիմելն է։