Փետրվարին ստացված տվյալներով օդի որակը լավ վիճակում է

Երևանի քաղաքապետարանը հրապարակում է բաց տվյալներ օդի որակի վերաբերյալ և ներկայացնում է կանխատեսումներ՝ առաջիկա օրերի և շաբաթվա համար։

Երևանում նոյեմբերին արձանագրված օդի աղտոտման բարձր մակարդակն այլևս չի դիտվում։ Այս մասին մարտի 16-ին Երևանի քաղաքապետարանի գործակարգավարական խորհրդակցության ժամանակ հայտարարել է քաղաքապետ Տիգրան Ավինյանը։

Նրա խոսքով՝ նոյեմբերից մարտ ամիսներին օդի որակը մեծամասամբ պայմանավորված է մթնոլորտային շերտի, այսպես կոչված, «մթնոլորտային առաստաղի» բարձրությամբ, որը տվյալ ժամանակահատվածում նվազում է մոտ 1,200 մետրից մինչև 80-100 մետր։

«Փաստացի բոլոր աղտոտումները, որոնք առկա են եղել 1,200 մետրի վրա, խտանում են 80-100 մետրի վրա։ Սա տեղի է ունենում ոչ միայն Երևանում, այլ ամբողջ Արարատյան դաշտավայրում՝ Վեդիում, Արտաշատում, ինչպես նաև Թուրքիայի տարածքներում և պայմանավորված է մեր աշխարհագրական դիրքով ու բնակլիմայական պայմաններով»,- նշել է քաղաքապետը։

Ավինյանի խոսքով՝ տաք եղանակների սկսվելուց հետո մթնոլորտային շերտը բարձրանում է մինչև 2,000 մետր, ինչի արդյունքում աղտոտման խտացման երևույթը նվազում է։

Քաղաքապետը նաև ընդգծել է, որ Երևանի քաղաքապետարանը հրապարակում է բաց տվյալներ օդի որակի վերաբերյալ և ներկայացնում է կանխատեսումներ՝ առաջիկա օրերի և շաբաթվա համար։